Qarshi shahrida Bosh prokuratura, Oliy sud hamda Ichki ishlar vazirligi rahbarlari va mas`ul xodimlar ishtirokida bir guruh shaxslar tomonidan o`ldirib ketilgani aytilgan sportchi Elbek Rahimovning jinoyat ishi yuzasidan matbuot anjumani bo`lib o`tdi.
Matbuot anjumanida Elbek Rahimovning qasddan o`ldirish bo`yicha jinoyat tafsilotlari muhokama qilindi.
Ma`lum bo`lishicha “ERIELL” (ERIEL) xorijiy kompaniyasi operatori, “ushu-sanda” sport ustasi, ko`plab xalqaro musobaqalar g`olibi Elbek Rahimov bilan fuqaro Zuxriddin Boymirzaev o`rtasida 2020 yil dekabridan buyon kelishmovchilik bo`lib kelgan.
Xususan, dastlab Boymirzaev Rahimovning ukasi bilan o`zaro tortishib qolgan.
Bunga javoban Elbek Rahimov joriy yilning 17 iyul kuni Boymirzaev bilan o`zaro janjallashgan.Yuzaga kelgan adovat zamirida Boymirzaev Rahimovdan o`ch olish maqsadida joriy yilning 17 avgust kuni soat 07:00 larda tanishlari Sh.Tangriberdiev, J.Amriev, Sh.Zayniddinov, Og`abek va Ilyos Ruzievlar, Ya.Yahyoev va E.Abduhafizovlar bilan jinoiy til biriktirib, pichoq va temir bo`laklari bilan qurollanib, E.Rahimovni Qarshi shahrida yashovchi fuqaro Babaevaga tegishli xonadondan chiqishini kutib turishgan.
Shu kuni soat 09:35 larda Boymirzaev jinoiy sheriklari bilan birga xonadondan chiqqan Rahimovni fuqarolarning ko`z o`ngida, shafqatsizlarcha urib - tepib, pichoq va temir bo`laklari bilan hayoti uchun xavfli tan jarohatlari etkazgan.
Shundan keyin, ular Rahimovni Ilyos Ro`ziev boshqaruvidagi avtomashinaga zo`rlab o`tqazib, Chiroqchi tumani “Toshli” qishlog`i hududiga olib borib, jabrlanuvchiga qo`l - oyoqlari va temir bo`lagi bilan ko`plab tan jarohatlari etkazib, o`lar holatda Chiroqchi tumani tibbiyot birlashmasiga tashlab ketishgan.
Ushbu holatdan fuqaro Babaeva orqali xabar topgan Rahimovning ukasi - Akmal Rahimov “GPS” orqali akasining telefoni geolokasiyasini aniqlab, tanishlari A.Babanazarov, Yu.Murodov, J.Berdinazarov va boshqalar bilan birga avtomashinada Chiroqchi tumaniga etib borishgan.
Shundan so`ng, Akmal Rahimov, Babanazarov, Murodov va Berdinazarovlar tumanning Chuvilloq qishlog`ida avtomashinada harakatlanib ketayotgan Z.Boynazarov, O.Ro`ziev, J.Amriev va Ya.Yahyoevlarni ko`rib qolib, avtomashinani to`xtatishib, Boynazarov va uning sheriklarini urib, tan jarohati etkazishgan.
Shifoxona ma`muriyati xabari asosida etib kelgan hudud profilaktika inspektorlari J.Ravshanov va S.Ahmedov janjal davomida tan jarohati olgan Og`abek Ro`ziev va Ya.Yahyoevlarni ushlashgan, janjalning qolgan ishtirokchilari yashiringan.
Elbek Rahimov ko`rsatilgan tibbiy yordamga qaramasdan, soat 14:00 da shifoxonada vafot etgan.
Sud - tibbiyot ekspertizasining ma`lumotnomasiga ko`ra, Rahimovning o`limiga bosh miyasining lat eyishi, bosh suyagining sinishi, ko`krak qafasi a`zolarining shikastlanishi, tanadagi boshqa ko`plab og`ir jarohatlari sabab bo`lgan.
Viloyat prokuraturasi tomonidan Elbek Rahimovning o`limi holati yuzasidan voqea sodir bo`lgan kun, ya`ni 17.08.2021 yilda Jinoyat kodeksining 97-moddasi 2-qismi “l,p” bandlari bilan jinoyat ishi qo`zg`atilib, jinoyat ishi tergov guruhiga topshirildi.
Tezkorlik va hamkorlikda olib borilgan tezkor-tergov harakatlari natijasida, shu kunning o`zida jinoyatning barcha ishtirokchilarining shaxsi aniqlanib, ular ushlandi, himoyachi ishtirokida so`roq qilindi va sud - tibbiyot ekspertizasi ko`rigidan o`tkazildi.
Hodisa sodir bo`lgan joy, Babaevaning uyi oldi ko`zdan kechirilganda, uch dona temir armatura bo`lagi, Rahimovga tegishli bir juft erkaklar poyafzali, bir dona erkaklar bosh kiyimi, qonga o`xshash dog`lar hamda pnevmatik to`pponcha o`qi daliliy ashyo sifatida olindi.
Shuningdek, Chiroqchi tumani “Toshli” qishlog`i hududidagi voqea joyi ko`zdan kechirilganida qonga o`xshash dog`lar hamda marhum E.Rahimovga tegishli qo`l soati ashyoviy dalil sifatida olindi.
Bundan tashqari, voqea kuni jinoyatchilar foydalangan 70 O 880 PA davlat raqamli “Jentra” rusumli avtomashinani ko`zdan kechirish jarayonida ham uch dona temir armatura, qonga o`xshash dog`lar bilan ifloslangan futbolka va pnevmatik to`pponcha olindi.
Jinoyatga aloqador dalillarni aniqlash maqsadida gumonlanuvchilarning yashash xonadonlarida o`tkazilgan 10 ta tintuvda 2 ta telefon, 2 ta SIM karta, qonga o`xshash dog`lar mavjud bo`lgan kiyimlar hujjatlashtirib olindi.
Dastlabki tergov harakatlari davomida 8 nafar ayblanuvchi,jabrlanuvchining qonuniy vakili, 10 ga yaqin guvohlar so`roq qilindi.
Hozirda viloyat prokuraturasi tomonidan tergov harakatlari aniq reja asosida davom ettirilmoqda, tergov ustidan nazorat o`rnatildi.
Albatta, tergov yakuni bo`yicha jinoyatning barcha holatlariga baho beriladi, uni keltirib chiqargan asl sabab va shart - sharoitlar o`rganiladi.
