2021 yilning ayni shu davriga kelib, “tez yordam” xizmatida mehnat qilayotgan shifokorlar soni 13 ming 660 nafarga etdi va sohani ushbu kadrlar bilan ta`minlanganlik darajasi 90 foizni tashkil qilmoqda.
Ma`lumki, keyingi yillarda mamlakatimizda zamonaviy tibbiyotning eng muhim yo`nalishi bo`lgan tez tibbiy yordam xizmati faoliyatini yanada takomillashtirish, sohani etuk va malakali kadrlar bilan ta`minlash masalasiga alohida e`tibor qaratilmoqda.
Bu bejiz emas, albatta. Boisi, bundan 4-5 yil avval tez tibbiy yordam xizmatida kadrlar masalasi eng og`riqli muammolardan biri edi. Shu bois, keyingi yillarda aynan mazkur yo`nalishda izchil islohotlar amalga oshirilib, “103” xizmatini etuk va malakali tibbiyot xodimlari bilan ta`minlash, ularni qayta tayyorlash va malakasini oshirishga jiddiy e`tibor berildi.
Natijada 2021 yilning ayni shu davriga kelib, sohada faoliyat olib borayotgan shifokorlar soni 13 ming 660 nafarga, ta`minlanganlik darajasi esa 90 foizga etdi.
Jumladan, bu ko`rsatkich Namangan va Buxoro viloyatlarida 100 foiz, Samarqand viloyatida 99 foiz, Qoraqalpog`iston Respublikasi hamda Andijon viloyatida 96 foizni tashkil qilmoqda.
“103” xizmatida faoliyat yuritayotgan shifokorlarning 2289 nafari yuqori malaka toifasiga, 2385 nafari 10-20 yillik, 2057 nafari esa 20 yildan ortiq stajga ega.
Shuningdek, hozirgi paytda “tez yordam” xizmatini reanimatolog-shifokorlar bilan ta`minlash borasida ham ijobiy ko`rsatkich qayd etilib, tizimda faoliyat olib borayotgan ushbu mutaxassislar soni 661 nafarga etkazildi. Bu borada eng yaxshi ko`rsatkich Samarqand, Buxoro va Xorazm viloyatlari hissasiga to`g`ri kelib, mazkur hududlarda “103” xizmati to`liq ushbu mutaxassislar bilan ta`minlangan.
Shu bilan birga, bugungi kunda sohada mehnat qilayotgan o`rta tibbiyot xodimlari 28 ming 408 nafar, ta`minlanganlik darajasi 98 foizni tashkil qilmoqda.
Aytish lozimki, ularning 5361 nafari yuqori malaka toifasiga, 5637 nafari 10-20 yil, 4145 nafari esa 20 yildan ortiq ish stajiga ega bo`lgan o`rta tibbiyot xodimlaridir.
