Bugun AOKAda Bandlik va mehnat munosabatlari vazirligi axborot xizmati rahbari Mavjuda Mirzaeva ishtirokida brifing bo`lib o`tdi. Unda fuqarolarning tadbirkorlik tashabbuslarini qo`llab-quvvatlash va ish beruvchilarda rasmiy bandlikni rag`batlantiruvchi subsidiyalar berish tartibi yuzasidan ma`lumot berildi:
— Bandlik va mehnat munosabatlari vazirligi tomonidan fuqarolarning tadbirkorlik tashabbuslarini qo`llab-quvvatlash va ish beruvchilarda rasmiy bandlikni rag`batlantiruvchi subsidiyalar ajratib kelinmoqda. Vazirlik:
Fuqarolarga:
- mehnat organlariga murojaat qilgan tadbirkorlik qilishni xohlovchi fuqarolarga – yakka tartibdagi tadbirkor sifatida ro`yxatdan o`tish, kichik korxonalar va mikrofirmalarni davlat ro`yxatidan o`tkazish, shu jumladan shtamplar va muhrlar olish, elektron raqamli imzo olish, tadbirkorlikka o`qish xarajatlarini to`lash va kreditni olish chog`ida sug`urta polisi haqini to`lash uchun xarajatlarni bazaviy hisoblash miqdorining 10 baravari miqdorida;
- ishsiz fuqaroning tomorqa xo`jaligini rivojlantirish uchun mehnat organi, etkazib beruvchi tashkilotlar va tomorqa er egalari o`rtasida tuzilgan uch tomonlama shartnomalar asosida — engil konstruksiyali issiqxonalar o`rnatish uchun bazaviy hisoblash miqdorining 30 baravarigacha, sug`orish vositalari xarid qilish uchun — bazaviy hisoblash miqdorining 10 baravarigacha, urug`liklar va ko`chatlar sotib olish uchun — bazaviy hisoblash miqdorining 3 baravarigacha miqdorda subsidiya ajratiladi;
- qishloq xo`jaligi kooperativlari ustav fondiga ulush sifatida kiritishi uchun — bazaviy hisoblash miqdorining 10 baravarigacha. Bunda, qishloq xo`jaligi kooperativlari baliqchilik, quyonchilik, parrandachilik, asalarichilik, meva-sabzavotchilik, uzumchilik, tikuvchilik, hunarmandchilik va boshqa ilg`or sohalarda tashkil etiladi.
- tadbirkorlik va o`zini o`zi band qilish faoliyatini boshlamoqchi bo`lgan ishsiz, shu jumladan «Temir daftar», «Ayollar daftari» va «Yoshlar daftari»ga kiritilgan fuqarolarga - faoliyatini boshlash uchun kerak bo`lgan asbob-uskuna, mehnat qurollarini xarid qilish uchun 7 million so`mgacha bo`lgan miqdorda subsidiyalar ajratiladi.
️ Ish beruvchilarga:
- mehnat organlari yo`llanmasi bo`yicha ishga qabul qilingan xodimlarni kasbga tayyorlash, qayta tayyorlash va ularning malakasini oshirishga sarflanadigan xarajatlarni qoplash uchun — har bir xodim uchun 6 oy davomida har oyda bazaviy hisoblash miqdorining 4 baravari miqdorida;
- ijtimoiy ehtiyojmand aholi qatlamlariga mansub shaxslarni kvotalangan eng kam sondan ortiq miqdorda ishga qabul qilgan tashkilotlarga — har bir xodim uchun 12 oy davomida har oyda bazaviy hisoblash miqdorining 2 baravari miqdorida;
- «O`zbekipaksanoat» uyushmasi tarkibidagi qo`lda gilam va ipak mato to`qish bilan shug`ullanuvchilarga 3 tadan kam bo`lmagan ish o`rni yaratish sharti bilan gilam va ipak mato to`qish dastgohini xarid qilishga sarflanadigan xarajatlarni qoplash uchun — har bir dastgoh uchun bazaviy hisoblash miqdorining 10 baravari miqdorida;
- “Qorako`lchilik” uyushmasi a`zolariga qo`l mehnati uchun uskunalar xarid qilish bo`yicha xarajatlarni qoplash uchun - kamida bitta ish o`rni yaratish sharti bilan bazaviy hisoblash miqdorining 10 baravari miqdorida;
- tadbirkorlik sub`ektlariga ish o`rinlari va sharoitlarini nogironligi bo`lgan shaxslarga moslashtirish uchun - har bir moslashtirilayotgan ish joyi uchun bazaviy hisoblash miqdorining 40 baravarigacha;
- o`rmon fondi erlarini ijaraga olgan ijarachilar ABKMda ro`yxatdan o`tgan ishsiz shaxslarni ishga qabul qilgan taqdirda, ularga ish haqi to`lash xarajatlarini qoplash uchun — 6 oy davomida o`rtacha ish haqining 50 foizi miqdorida, biroq har bir oy uchun bazaviy hisoblash miqdorining 2 barobaridan oshmagan miqdorda;
- usta-shogird an`analari asosida yoshlarga hunar o`rgatayotgan kulollarga shogirdlar tayyorlashi, zarur xom ashyo sotib olishi va shogirdlarni ish haqi bilan ta`minlashi hamda hunarmandlarning «Hunarmand» uyushmasiga a`zolik badali xarajatlarini qoplash uchun subsidiyalar ajratiladi.
