Senat raisi TIV faoliyatida qator kamchiliklar borligini ta`kidladi (foto)

Bugun 26 avgustda  O`zbekiston Respublikasi Oliy Majlisi Senatining o`n sakkizinchi yalpi majlisi o`tkazildi. Mazkur yig`ilish marhum senator Xoldorovning yaqinlariga ta`ziya bildirish bilan ochildi, deya xabar bermoqda Oliy Majlisi Senati axborot xizmati.

Yig`ilish davomida O`zbekiston Respublikasi tashqi ishlar vazirining 2021 yil birinchi yarim yilligidagi faoliyati to`g`risidagi axboroti eshitilgan.

Majlisda Tashqi ishlar vazirligi tomonidan O`zbekiston tashqi siyosatini amalga oshirish, davlat manfaatlari va mamlakat fuqarolarining xorijiy davlatlar bilan munosabatlarda, shuningdek, xalqaro va mintaqaviy tashkilotlarda huquqlarini himoya qilish bo`yicha muayyan faoliyat amalga oshirilgani ta`kidlangan. Bunda vazirliklar, idoralar, muassasalarning xalqaro aloqalarni rivojlantirish bo`yicha faoliyatini tartibga solishga alohida e`tibor qaratilgani aytilgan.

Jumladan, TIV ning faol ishtirokida 2021 yilning birinchi yarim yilligida davlat rahbarining 40 dan ortiq tashrifi va xorijiy mamlakatlarning etakchilari, xalqaro tashkilotlar rahbarlari bilan uchrashuvlari tashkil etilgan.

Ikki tomonlama aloqalarni mustahkamlash va hamkorlikni rivojlantirish maqsadida vazirlik va idoralar, mamlakat hududlari hokimliklari vakillarining xorijiy mamlakatlarga 125 ta tashrifi bo`lib o`tgan.

Ammo Senat tomonidan o`tkazilgan o`rganish, shuningdek, uni xalq deputatlari mahalliy Kengashlaridagi muhokama qilish jarayonida Tashqi ishlar vazirligi faoliyatida qator muammo va kamchiliklar borligi aniqlangan.

Xususan, diplomatik missiyalar tomonidan taklif etilayotgan investisiya loyihalarining o`z vaqtida va sifatli bajarilishini nazorat qilish bo`yicha mahalliy davlat hokimiyati organlari bilan tizimli ishlarni tashkil etish zarurligi ham ta`kidlangan.