Jahon Fanlar akademiyasi prezidenti doktor Hasan Muhammad Innovasion rivojlanish vazirligiga tashrif buyurdi. Bu haqda Innovasion rivojlanish vazirligining Matbuot xizmati ma`lum qildi.
Innovasion rivojlanish vaziri Ibrohim Abdurahmonov mehmonni ilm-fan, texnolgoiyalar va innovasiyalar sohasida amalga oshirilayotgan ishlar bilan tanishtirdi, jumladan, vazirlik ko`magida tashkil etilgan startaplar va ilmiy ishlanmalar natijalari, vazirlikda tashkil etilgan laboratoriyalar ko`zdan kechirildi.
Mehmon yaratilgan imkoniyatlar ko`lami va tashkil etilgan ishlar samaradorligini yuqori baholadi hamda boshqa rivojlanayotgan davlatlar ushbu yutuqlarga erishish tajribasini O`zbekistondan o`rganishi mumkinligini belgilab o`tdi.
Shuningdek, tomonlar ko`plab sohalar, jumladan, qishloq xo`jaligi va biotexnologiyalar sohalarida innovasiyalarni joriy etishda hamkorlik qilish imkoniyatlarini muhokama qildilar.
Shu bilan birga, d-r Hasan Muhammad Olmazor tumanidagi yangi tashkil etilayotgan texnoparkni ko`zdan kechirdi.
