O`zbekiston davlat san`at va madaniyat institutiga Turkiyaning O`zbekistondagi elchixonasi matbuot bo`limi boshlig`i Hamdi Turshuju boshchiligidagi Turkiya delegasiyasi tashrif buyurdi. Bu haqda institut Axborot xizmati xabar bermoqda.
O`zbekiston davlat san`at va madaniyat instituti rektori, filologiya fanlari doktori, professor Ibrohim Yo`ldoshev mehmonlarga institutda amalga oshirilayotgan ishlar, o`quv jarayonlari, ilm-fan sohasidagi izlanishlar haqida so`zlab berdi.
Muloqotlar jarayonida o`zbek-turk so`zlarining ma`nosi, ular o`rtasidagi o`xshashliklar borasida fikrlar bildirildi. Hamdi Turshuju rasmli va yozuvli folklor turkcha-o`zbekcha izohli lug`at yaratish istagi borligini aytdi.
Ibrohim Yo`ldoshev ushbu g`oya har ikki davlat uchun ham nihoyatda foydali, tili bir-biriga yaqin bo`lgan xalqlar uchun muhim ekanligini e`tirof etdi.
Tashrif chog`ida delegasiya a`zolari tomonidan Turkiyadagi oliy o`quv yurtlarida o`zbek tilida, O`zbekistondagi oliy o`quv yurtlarida esa turk tilida darslarni joriy qilish bo`yicha fikrlar bildirildi.
Shuningdek, uchrashuvda Turkiya elchixonasi Madaniyat va turizm bo`limi boshlig`i Alp Arslan Akinji ham ishtirok etdi.
O`zbekiston davlat san`at va madaniyat instituti rektori Ibrohim Yo`ldoshevga Turkiya madaniyat vazirligi tomonidan tayyorlangan “O`zbekiston kelajagi buyuk davlat” kitobini taqdim qilishdi.
Samimiy kechgan muloqotda o`zaro hamkorlikning yangi istiqbollari xususida fikrlashib olindi.
