Prezident Shavkat Mirziyoev Qoraqalpog`iston Respublikasiga tashrifini yakunlab, Xorazmni ko`zdan kechirmoqda. "Darakchi" muxbiri Sardorbek Rahmonqulovning xabar berishicha, Prezident viloyatdagi to`rtta dolzarb muammoni birma-bir sanab o`tgan.
" – Bugungi kunda Xorazmdagi eng katta muammolardan biri – 80 mingdan ziyod aholi bandligini ta`minlashimiz kerak. Shuningdek, mehnat bozoriga har yili 30 ming nafar yoshlar kirib kelmoqda. Ayniqsa, bu masala Qo`shko`pir, Yangiariq, Yangibozor tumanlarida o`ta dolzarb.
Ikkinchi muhim masala – aholining hayot darajasi va infratuzilmani yaxshilash. Viloyatda ko`plab oilalarning yashash sharoitini yaxshilashga ehtiyoj bor. Birgina Xonqada 6 ming oila (18 foizi) uy-joyga muhtoj. Xazorasp, Xiva, Shovot, Yangiariq aholisining ichimlik suv ta`minoti past darajada qolmoqda.
Barcha tumanlarda yo`l-transport, ijtimoiy va muhandislik infratuzilmasini yaxshilash talab etiladi.
Uchinchi jiddiy muammo – 542 ming nafar yoki 30 foiz aholining surunkali kasalligi bor. Urganch shahri, Xazorasp, Qo`shko`pirda – yurak qon-tomir, Xiva, Xazorasp, Xonqa tumanlarida – qandli diabet, Shovot, Xonqa, Xazoraspda – nafas yo`llari kasalliklari ko`p uchramoqda.
To`rtinchi dolzarb masala – ta`lim sohasidagi muammolar viloyat yoshlarining salohiyatini va aniq fanlarga intilishini ro`yobga chiqarishga to`siq bo`lmoqda.
Viloyatda 30 ta maktabda o`qish 2–3 smenada tashkil etilmoqda. Kelgusi 5 yilda o`quvchilar soni 35 mingtaga ko`payib, maktablarga yuklama yanada oshadi", – degan davlat rahbari.
