Prezident klaster tizimidagi kamchilik va muammolarni sanab o`tdi

Prezident Shavkat Mirziyoev ishtirokida bo`lib o`tgan videoselektor yig`ilishida klaster rahbarlari va fermerlardan yozma ravishda kelib tushgan takliflar va eng dolzarb 30 dan ziyod muammo va masalalar ko`rib chiqilishi ma`lum qilindi.

“Darakchi” muxbiri Sardorbek Rahmonqulovning yig`ilishdan xabar berishicha, ushbu tizimdagi muammolarning echimlari bo`yicha takliflar ishlab chiqilgan. 

Eng asosiy muammo – amaldagi eskicha moliyalashtirish tartibi, ayni paytda klaster tizimini rivojlantirish bo`yicha qo`yilgan talablarga mutlaqo javob bermayapti. Ayniqsa, paxta-to`qimachilik klasterlari, kredit muddatlarini uzaytirish va miqdorini ko`paytirishni so`ragan. Muammo shundaki, hozirda klasterlarga kredit 11 oy muddatga ajratiladi. Paxta xom ashyosini etishtirib, uni qayta ishlashga esa, kamida 24 oy kerak. Erni ekishga tayyorlash ishlari oktyabrda boshlansa-da, kredit 3-4 oy kechiktirilib, yanvar-fevral oylaridan ajratiladi.

“Bu eskirgan tizim, endi to`liq o`zgaradi”, dedi davlat rahbari.

Bundan buyon:

• klasterlarga kreditlar 24 oy muddatga ajratilib, uning imtiyozli davri amaldagi 11 oydan 18 oygacha uzaytiriladi;
• Paxta etishtirish uchun imtiyozli kreditlar, faqat klasterlar orqali moliyalashtiriladi;
• Qishloq xo`jaligi jamg`armasidan ajratiladigan mablag`, hosil etishtirishning amaldagi 60 foizidan 80 foizigacha oshiriladi;
• yakuniy hisob-kitob uchun, klaster oladigan kredit foizining Markaziy bank stavkasidan oshadigan qismiga byudjetdan kompensasiya ajratiladi.

Bu tizimni joriy etishga, byudjetdan 10 trillion so`m yo`naltiriladi.