Президент Шавкат Мирзиёев иштирокида бўлиб ўтган видеоселектор йиғилишида кластер раҳбарлари ва фермерлардан ёзма равишда келиб тушган таклифлар ва энг долзарб 30 дан зиёд муаммо ва масалалар кўриб чиқилиши маълум қилинди.
“Даракчи” мухбири Сардорбек Раҳмонқуловнинг йиғилишдан хабар беришича, ушбу тизимдаги муаммоларнинг ечимлари бўйича таклифлар ишлаб чиқилган.
Энг асосий муаммо – амалдаги эскича молиялаштириш тартиби, айни пайтда кластер тизимини ривожлантириш бўйича қўйилган талабларга мутлақо жавоб бермаяпти. Айниқса, пахта-тўқимачилик кластерлари, кредит муддатларини узайтириш ва миқдорини кўпайтиришни сўраган. Муаммо шундаки, ҳозирда кластерларга кредит 11 ой муддатга ажратилади. Пахта хом ашёсини етиштириб, уни қайта ишлашга эса, камида 24 ой керак. Ерни экишга тайёрлаш ишлари октябрда бошланса-да, кредит 3-4 ой кечиктирилиб, январь-февраль ойларидан ажратилади.
“Бу эскирган тизим, энди тўлиқ ўзгаради”, деди давлат раҳбари.
Бундан буён:
- кластерларга кредитлар 24 ой муддатга ажратилиб, унинг имтиёзли даври амалдаги 11 ойдан 18 ойгача узайтирилади;
- Пахта етиштириш учун имтиёзли кредитлар, фақат кластерлар орқали молиялаштирилади;
- Қишлоқ хўжалиги жамғармасидан ажратиладиган маблағ, ҳосил етиштиришнинг амалдаги 60 фоизидан 80 фоизигача оширилади;
- якуний ҳисоб-китоб учун, кластер оладиган кредит фоизининг Марказий банк ставкасидан ошадиган қисмига бюджетдан компенсация ажратилади.
Бу тизимни жорий этишга, бюджетдан 10 триллион сўм йўналтирилади.
