12-noyabr kuni O`zbekiston Badiiy akademiyasi Markaziy ko`rgazmalar zalida III Toshkent amaliy san`at xalqaro biennalesi bo`lib o`tdi. Tadbir 2021 yilning 8-13 noyabr kunlari “Zamonaviy amaliy san`at: dekor va uslub” nomi ostida o`tkazildi. Rasmiy yopilish marosimida Bosh vazir o`rinbosari – Turizm va sport vaziri Aziz Abduhakimov ishtirok etdi.
Aziz Abduhakimov O`zbekiston Prezidenti Shavkat Mirziyoevning 2017 yil 3 avgustdagi ijodkor ziyolilar vakillari bilan uchrashuvida madaniyat, adabiyot va san`at, tasviriy va amaliy san`at yo`nalishidagi dolzarb vazifalar belgilab berilganini ta`kidlagan holda biennalening maqsadiga to`xtalib o`tdi.
“III Toshkent amaliy san`at xalqaro biennalesining asosiy maqsadi zamonaviy amaliy san`atni jahon hamjamiyatiga namoyish qilish orqali milliy qadriyatlarni asrash, turli xalqlar o`rtasida do`stlik va hamkorlik aloqalarini mustahkamlash, shuningdek unutilgan an`analarni tiklashdan iboratdir”, - dedi Aziz Abduhakimov.
Xalqaro biennaleda Fransiya, Italiya, Shvesiya, Avstraliya, Keniya, Yaponiya, Xitoy, Pokiston, Turkiya, Ummon, Eron, Ozarboyjon, Tojikiston, Qozog`iston, Belarus, Rossiya, Ukraina va Bolgariya kabi mamlakatlardan 60 dan ziyod amaliy san`at ustalari ishtirok etishdi. O`zbekiston nomidan 100 dan ortiq hunarmand o`z san`at asarlarini namoyish qildi.
Biennale doirasida o`zbek va xorijiy dekorativ san`ati, milliy sopol mahsulotlari, xattotlik, miniatyura ishlari ko`rgazmalari, kulolchilik va tasviriy san`at bo`yicha mahorat darslari, yosh dizaynerlarning milliy va zamonaviy liboslar namoyishlari o`tkazildi.
Ko`rgazma O`zbekiston Badiiy akademiyasining Markaziy ko`rgazmalar zali, Ikuo Xirayama Xalqaro madaniy karvonsaroyi, Toshkent fotografiya uyi, Kamoliddin Behzod nomidagi Sharq miniatyura san`ati muzeyi hamda Tasviriy san`at galereyasida o`tkazildi.
Dastur doirasida xorijiy amaliy san`at ustalari Samarqandga sayohat qilishdi va hududning madaniy hamda turistik salohiyati, shuningdek o`zbek xalqining turmush tarzi, tarixi va madaniyati bilan yaqindan tanishishdi.
Biennalening hakamlar xay`ati tarkibidan xorijiy mamlakatlarning nufuzli vakillari – Ozarboyjon Milliy fanlar akademiyasining San`at va arxitektura instituti direktori Ertegin Salomzoda, Butunrossiya dekorativ san`ati muzeyi rahbari Elena Titova, YuNESKOning Markaziy Osiyo bo`yicha xalqaro eksperti Nadejda Jdravkova o`rin olishdi.
Hakamlar xay`ati xulosasiga ko`ra, quyidagilar sovrinli o`rinlarni egallashdi:
1-o`rin - Zarafshon Shakardodova, Dilmurod Sharipov (Tojikiston);
2-o`rin - Ubolsin Daulenova (Qozog`iston);
3-o`rin - Irina Lebedeva (Rossiya).
Biennale Gran-prisiga O`zbekiston vakili – keramika san`ati ustasi Abduvohid Karimov munosib ko`rildi.
