“O`zbekneftgaz” AJ Boshqaruvi raisi Mehriddin Abdullaev boshchiligidagi “Ishchi guruh” a`zolari konlardagi geologik izlov-qidiruv ishlari, gaz quduqlarini burg`ilash, kapital ta`mirlash borasida olib borilayotgan chora-tadbirlar, ularning samaradorligi, amalga oshirilayotgan yangi loyihalar holatini o`rganish maqsadida Sho`rtan neft va gaz qazib chiqarish boshqarmasiga qarashli konlarda bo`ldi.
Ta`kidlash kerakki, Sho`rtan boshqarmasi tomonidan tabiiy gaz qazib olish bo`yicha belgilangan reja bajarib kelinmoqda, shu bilan birga yil yakuni bilan o`sish sur`atini bajarish bo`yicha barcha zaruriy choralar ko`rilgan bo`lib, 8 ta quduqni burg`ilash, 6 ta quduqlarda mukammal ta`mirlash va intensifikasiya ishlari ham amalga oshirilmoqda.
Boshqaruv raisi belgilangan rejani bajarish yo`lida mehnat qilayotgan Boshqarma jamoasining mashaqqatli mehnatini e`tirof etgan holda, belgilangan rejani bajarib kelishayotgani uchun ularga o`z minnatdorchiligini bildirdi hamda yanada yaxshiroq natijaga erishish uchun barcha qurilmalarni barqaror ishlashi, qurilmalarini modernizasiya qilish loyihalarini yakunlash kerakligini ta`kidladi.
Eng asosiysi esa, Sho`rtan boshqarmasi yil yakuni bilan 9,0 mlrd kub metr, shundan dekabr oyida - 775,9 mln kub metr tabiiy gaz qazib chiqarish shart ekanligi belgilandi.
Qashqadaryo viloyatiga qilingan tashrif davomida amalga oshirilayotgan geologiya-qidiruv ishlarining holati alohida o`rganilib, “Sho`rtan” konining katta chuqurlikdagi qatlamlarini o`zlashtirish maqsadida yangi “Terrigen-1” yura qudug`ini burg`ilashga tayyorgarlik jarayonlari tahlil qilindi.
2021 yilda “Sho`rtan” koni hududida “3D” seysmik-qidiruv ishlari olib borildi va konning imkoniyatlari sinchkovlik bilan o`rganildi. Natijada, 300 dan ortiq quduqlarning ma`lumotlari tahlil qilinib, kompleks raqamli modellashtirish asosida yangi “Terrigen-1” qudug`ini burg`ilash uchun asos yaratildi.
Uglevodorodlar zaxiralarini ko`paytirish bo`yicha ishlab chiqilgan Dastur asosida 2021 yilning o`tgan davrida “Sho`rtan” konida “3D” seysmika-geofizika ishlari amalga oshirilib, olingan natijalar tahlili asosida ushbu “Terrigen-1” qudug`ini burg`ilash ishlari boshlanishi bo`yicha muhim qaror qabul qilindi.
“Sho`rtan” koni hududi kelajakda ham umidli region bo`lib, qabul qilingan qaror shubhasiz tarixiy hisoblanadi, chunki geofizika ishlaridan keyin Qashqadaryo viloyati hududida tarixda ilk bor 4750 metr quyi terrigen qatlamigacha tushiladi va shu chuqurlikka qadar burg`ilash ishlari amalga oshiriladi.
Bugungi kunga qadar “Sho`rtan” konining 3500 metr chuqurlikkacha bo`lgan salohiyati o`zlashtirilgan bo`lib, yangi quduqni 4750 metr chuqurlikkacha burg`ilash orqali tabiiy gazning yangi, mahsuldor zaxiralarini topish hamda sanoat miqyosida qazib chiqarish maqsad qilingan.
Ma`lumot o`rnida aytish kerakki, Sho`rtan regionidagi konlar, xususan “Sho`rtan” koni “Sho`rtan gaz kimyo majmuasi” va ushbu kompleks bazasida yangidan ishga tushirilayotgan “GTL” zavodining ham xomashyo bazasi hisoblanadi. Shu sabab, neft-gaz zaxiralarini o`stirish maqsadida burg`ilash ishlari boshlangan “Sho`rtan” koni “Terrigen-1” izlov-qidiruv qudug`idagi ishlar bilan yaqindan tanishib chiqildi.
Hozirda yangi quduqda burg`ilash ishlari ishlarini jadallashtirish uchun, 30 dan ortiq maxsus texnika va 50 dan ortiq malakali mutaxassislar jalb etildi, shuningdek, barcha zarur material texnik jihozlar shay holatga keltirildi.
Boshqaruv raisi joylardagi rahbar va mutaxassislarga ushbu quduqdan kutilayotgan natijalarning juda muhim ekanligi, bu orqali nafaqat “Sho`rtan” koni, balki uning atrofidagi barcha maydonlarning 3500 metrdan ko`proq chuqurligida yangi zaxiralarni aniqlash imkoniyatlari mavjudligini ta`kidlab o`tdi.
“O`zbekneftgaz” AJ o`z navbatida istiqbolli, yangi maydonlarni aniqlash maqsadida “3D” seysmik-qidiruv ishlarini davom ettirib, Davlat geologiya qo`mitasi bilan hamkorlikdagi ishlarni yangi bosqichga olib chiqdi.
Sho`rtan neft va gaz qazib chiqarish boshqarmasidagi o`rganish jarayonida esa, ushbu chora-tadbirlarni amalga oshirishda eng avvalo ishchi-xodimlar holidan xabardor bo`lish, ularning muammolarini muntazam o`rganish, ular bilan doimiy muloqotda bo`lish hamda vaxta rejimida uzluksiz ish tashkil qilishni ta`minlash maqsadida vagon-uylarda yashash, ovqatlanish sharoitlariga alohida e`tibor qaratildi.
Ishning sifatli tashkil etilishi hamda chora-tadbirlarning belgilangan muddatda bajarilishini muhokama qilish uchun, Boshqaruv raisi boshchiligida, “Ishchi guruh” a`zolari, departament boshliqlari, boshqarma direktori, o`rinbosarlari va mutaxassislari ishtirokida Boshqarmadagi Shtabda tezkor yig`ilish ham o`tkazildi.
Yig`ilishda muhim masalalar echimi o`rganilib, jumladan, seysmik tadqiqotlarni samarali amalga oshirish, uning natijasida neft va gazga istiqbolli yangi maydonlarni aniqlash, yangi konlar ochilishiga zamin yaratish, mavjud konlarni qo`shimcha o`zlashtirishga tayyorlash uchun aniqlangan maydonlarda burg`ilash ishlarini olib borish belgilandi.
Uglevodorodlarning yangi zaxiralarini o`stirish hamda ishga tushirilishi rejalashtirilayotgan “GTL” zavodini xomashyo bazasini bilan ta`minlanishi bo`yicha ko`rsatmalar berildi. Boshqaruv raisi tomonidan tegishli mas`ullarga topshiriqlar berildi va 2022 yilda ham burg`ilash ishlarini davom ettirish, quduqlarni ishga tushirish bo`yicha tegishli departament boshliqlari, pudratchi tashkilot vakillariga vazifalar belgilab berildi.
Eslatib o`tamiz, Boshqaruv raisi boshchiligidagi “Ishchi guruh” a`zolarining Qashqadaryo viloyatidagi tabiiy gaz qazib va qayta ishlash korxonalari faoliyatini o`rganish ishlari davom etadi.
