O`zbekiston va Tojikiston kinoijodkorlari hamkorligida suratga olinishi ko`zda tutilgan “Jomiy va Navoiy” kinoloyihasi ustidagi ishlar davom etmoqda. Ayni paytda kinorejisserlar Furqat Usmonov, Shohrux Rasulov, ssenariynavis Rustam Jabborov Tojikiston Respublikasida film ssenariysini yaratish ustida tojikistonlik hamkorlar bilan ish olib borishmoqda.
Avval xabar qilinganidek, O`zbekiston Respublikasi Prezidentining 2021 yil 10-11 iyun kunlari Tojikiston Respublikasi qilgan rasmiy tashrifi Shavkat Mirziyoev tomonidan o`zbek va tojik xalqlarining buyuk mutafakkirlari – Alisher Navoiy va Abdurahmon Jomiy hayoti va do`stligi haqida film suratga olish taklifi bildirilgan, bu taklif o`z navbatida Tojikiston Prezidenti Emomali Rahmon tomonidan qo`llab-quvvatlangan edi.
O`tgan vaqt mobaynida ana shu tashabbusni amalga oshrish maqsadida ikki davlat kinoijodkorlari va olimlari ishtirokida Toshkent va Dushanbeda bir necha bor muzokaralar o`tkazildi.
2021 yil 28 sentyabr-3 oktyabr kunlari o`tkazilgan “Ipak yo`li durdonasi” Toshkent xalqaro kinofestivali doirasida ana shu filmni hamkorlikda suraga olish yuzasidan O`zbekiston Respublikasi kinematografiya agentligi bosh direktori Firdavs Abduxoliqov va “Tojikfilm” davlat muassasasi bosh direktori Mahmasaid Shohiyon tomonidan memorandum imzolandi.
2021 yilning 25-25 dekabr kunlari tojikistonlik kinoijodkorlar Toshkentga tashrif buyurib, film konsepsiyasi va sinopsisi bo`yicha hamkorlikda ishlashgan edi. 5 yanvar kuni ushbu kinoloyihaning o`zbekistonlik ishtirokchilari Tojikistonga etib kelishdi.
Dastlab, kinoijodkorlar lokasiyalar uchun ma`lumot to`plash maqsadida Dushanbe shahridagi Mavlono Ya`qub Charxiy maqbarasi, Hisor shahridagi tarixiy qal`a, karvonsaroy va madrasa, Buxoro amirligi qarorgohi singari tarixiy obidalarni tomosha qilishdi.
“Tojikfilm” davlat muassasasida o`zbekistonlik va tojikistonlik kinoijodkorlar o`rtasida muloqot o`tkazildi.
Unda “Tojikfilm” DM raisi M.Shohiyon, rais o`rinbosari T.G`aybullozoda, O`zbekiston Kinematografiya agentligi Hujjatli va xronikal filmlar studiyasi direktori F.Usmonov, Agentlik Badiiy kengashi a`zosi R.Jabborov so`nggi yillarda ikki mamlakat o`rtasidagi madaniy aloqalar, xususan kinematografiyani rivojlantirish borasidagi hamkorlik rivojlanayotgani, “Jomiy va Navoiy” badiiy filmini yaratish zarurati, mazkur kinoloyihaning muhim jihatlari xususida so`z yuritdilar.
Shundan so`ng mazkur kinoloyihaga jalb qilib o`zbek va tojik kinoijodkorlari Dushanbe shahridan 60 kilometr masofadagi “Xo`ja Obigarm” dam olish maskaniga jo`nab ketishdi. Bu erda ular bir necha kun davomida “Jomiy va Navoiy” badiiy filmining ssenariysi ustidagi ishlarni davom ettirishadi. Mazkur kinoloyihaga hozircha ssenariy hammuallifi sifatida Tojikiston Kinoijodkorlar uyushmasi raisi Safar Haqdodov, rejissyor Fayzullo Fayzov jalb qilingan.
