Shaxmatchilarga pul mukofatlari topshirildi

Xabaringiz bor, 2021-yil 26-30-dekabr kunlari Polshaning Varshava shahrida o`tkazilgan shaxmat bo`yicha rapid va blis yo`nalishlaridagi FIDE jahon chempionatida hamyurtlarimiz munosib ishtirok etishdi.

Jumladan, nufuzli musobaqaning rapid yo`nalishida hamyurtimiz Nodirbek Abdusattorov barcha raqiblarini ortda qoldirgan holda jahon chempioni degan yuksak nomga sazovor bo`ldi. Shu bilan birga u dunyo tarixidagi eng yosh jahon chempioniga aylandi. Yana bir hamyurtimiz Javohir Sindarov esa blis yo`nalishida ancha yuqori bo`lgan 8-o`rinni qo`lga kiritdi.

Yangi O`zbekiston nomini dunyoga tanitgan iste`dodli shaxmatchimiz hukumatimiz tomonidan munosib e`tirof etildi. Nodirbek Abdusattorov O`zbekiston Respublikasi Prezidenti farmoniga ko`ra “Mard o`g`lon” davlat mukofoti hamda Prezident sovg`asi sifatida 2 xonali uy bilan taqdirlandi.

Shuningdek, mazkur jahon chempionatida munosib ishtirok etgan terma jamoamiz a`zolari Turizm va sport vazirligi tomonidan mukofotlanishdi. Jumladan, Nodirbek Abdusattorov 250 million so`m, uning trenerlari Dmitriy Qayumov (marhum) hamda Jahongir Vohidovlar 100 million so`mdan, Javohir Sindarov 50 million so`m va nihoyat Shamsiddin Vohidov 25 million so`m miqdoridagi pul mukofotiga loyiq ko`rilishdi.

Bugun shaxmatning rapid va blis yo`nalishlari bo`yicha jahon chempionati qahramonlari Turizm va sport vazirligida tegishli pul mukofotlarini qabul qilib oldilar.