Shavkat Mirziyoev qurilish, yo`l infratuzilmasini yaxshilash va tabiiy gaz ta`minotiga oid loyihalar bilan tanishdi

Prezident Shavkat Mirziyoev 10 yanvar kuni qurilish, yo`l infratuzilmasini yaxshilash va tabiiy gaz ta`minotiga oid loyihalar bilan tanishdi. Bu haqda Prezident Matbuot xizmati xabar berdi. 

Toshkent viloyatida savdo va servisni rivojlantirish uchun katta imkoniyatlar bor. Shu bois avtomobil yo`llarini kengaytirib, yo`l bo`yi xizmatlarini ko`paytirish bo`yicha ko`plab loyihalar ishlab chiqilmoqda.

“Toshkent-Chinoz” avtomobil yo`lini ta`mirlash loyihasi ulardan biri. Ma`lumki, bu yo`l juda serqatnov bo`lib, bir kecha-kunduzda 60-65 ming avtotransport harakatlanadi. Shu bois uning 10 kilometr qismini ta`mirlash, 5 dona erosti o`tish yo`lagi va qo`shimcha mahalliy yo`llar qurish mo`ljallangan.

Poytaxtimizdagi Temur Malik ko`chasini 6 tasmali etib kengaytirish, uning ikki chetida ko`p qavatli uy va xizmat ko`rsatish binolari qurish, Jizzax shahridagi O`zbekiston ko`chasida 210 metrli yo`l o`tkazgich barpo etish bo`yicha ham loyihalar rejalashtirilgan.

Davlatimiz rahbari bu loyihalarni ma`qullab, ularning hujjatlarini ishlab chiqish, sifatli qilib qurish bo`yicha mutasaddilarga topshiriqlar berdi.

Taqdimotda tabiiy gaz etkazib berish tizimida xususiy sheriklikni joriy etishga doir takliflar ham ko`rib chiqildi.

Bu tizimni modernizasiya qilish juda dolzarb. Chunki yurtimizdagi gaz quvurlarining yarmidan ko`pi – 45 ming kilometri o`ttiz yildan ortiq ishlatilmoqda. Oqibatda yo`qotishlar miqdori 20 foizdan oshib ketayapti.

Xususan, bugungi kunda Jizzax shahar gaz ta`minoti tizimida 767 kilometr quvur, 6 ta gaz taqsimlash stansiyasi, 1 ming 600 dan ziyod gaz taqsimlash punkti bor. Ushbu tizimni xalqaro standartlar asosida va to`g`ridan-to`g`ri investisiyalar jalb qilish orqali modernizasiya qilish bo`yicha loyiha ishlab chiqilgan.

Texnik ustuvor echimlardan foydalanib amalga oshiriladigan loyiha doirasida eski gaz quvurlari olib tashlanib, 1 ming 500 kilometrdan ziyod yangi quvurlar tortilishi rejalashtirilgan. Shuningdek, gaz taqsimlash stansiyalari soni 6 tadan 2 tagacha qisqartirilib, 3 bosqichli tizimdan 2 bosqichli tizimga o`tiladi. Natijada hozirgi  holatdagi 115 million kub metr yo`qotishlar bartaraf etiladi.

Prezidentimiz bu loyihaning samaradorligiga alohida ahamiyat qaratib, uni tezlashtirish zarurligini ta`kidladi. Shuningdek, bunday tizimni bir paytning o`zida Sirdaryo viloyati Guliston shahrida, keyinchalik boshqa hududlarda ham amalga oshirish vazifasi qo`yildi. Bu ishlar gaz taqsimlash va hisob-kitobni tartibga solib, uning xalqimizga barqaror va to`la etib borishiga xizmat qiladi.