Termiz shahrida voleybol bo`yicha 2004-yil va undan kichik yoshdagi qizlar o`rtasida o`tkazilgan Respublika turniri yakunlandi. Bu haqda O`zbekiston Respubilkasi Turizm va sport vazirligi matbuot xizmati xabar bermoqda.
Termiz davlat texnika universiteti sport majmuasi mezbonlik qilgan musobaqada Qoraqalpog`iston Respublikasi, Namangan, Andijon, Farg`ona, Xorazm, Qashqadaryo hamda Surxondaryo viloyatidan 2ta jamoa g`oliblik uchun bahs olib borishdi.
Qur`a natijasiga ko`ra “A” guruhidan Xorazm, Qashqadaryo, Andijon va Surxondaryo-2 jamoalari o`rin olishdi. Ushbu kvartetda barcha o`yinlarni ko`tarinki ruhda o`tkazgan andijonlik voleybolchi qizlar guruh g`olibi sifatida yarim finalga yo`l olishdi. Xorazm viloyati jamoasi esa 2-o`rinni egalladi.
“B” guruhida Namangan viloyati jamoasi 1-o`rinni qo`lga kiritgan bo`lsa, Qoraqalpog`iston Respublikasi yosh voleybolchi qizlari ikkinchi bo`lishdi. Farg`ona va Surxondaryo-1 jamoalari keyingi o`rinlarni band etdi.
Vodiy jamoalari yarim finalni ham ko`tarinki ruhda o`tkazishib, finalga yo`l oldi. O`ziga xos “vodiy derbisi”da Andijon viloyati jamoasi namanganlik dugonalarini 3-2 hisobida mag`lubiyatga uchratdi va Respublika turniri g`olibligini qo`lga kiritdi.
Ta`kidlash kerak, ushbu musobaqa joriy yil iyun oyida Toshkent shahrida ilk bor o`tkaziladigan qizlar o`rtasida U-17 Osiyo chempionati oldidan terma jamoaga munosib nomzodlarni saralash imkonini berdi.
