Toshkent viloyati hokimi vazifasini bajaruvchi Zoyir Mirzaev Federal davlat avtonom oliy ta`lim muassasasi "Milliy texnologik tadqiqotlar universiteti" "MISiS"ning Olmaliq shahridagi filiali talabalari bilan uchrashdi. Bu haqda "Darakchi" muxbiri Mansur Abdusattorov xabar bermoqda.
Qayd etilishicha, viloyat hokimiga Innovasion rivojlanish vaziri Ibroxim Abduraxmonov, “Olmaliq kon-metallurgiya kombinati” AJ boshqaruvi raisi Abdulla Xursanov va shahar hokimi Qobil Xamdamov hamrohlik qilgan.
Dastlab mehmonlarga Filialda raqamli muhitni yaratish doirasida amalga oshirilayotgan chora-tadbirlar haqida taqdimot qilinga. Filialning 2021-2030 yillarga mo`ljallangan strategik rivojlanish konsepsiyasining asosiy yo`nalishlari, ularning OKMKda amalga oshirilayotgan yirik investision loyihalar bilan uyg`unligi bo`yicha ma`lumot berilgan.
Shundan so`ng, mehmonlar bu erda professor-o`qituvchilar va talabalar uchun yaratilgan sharoitlar bilan tanishishadi.
Zoyir Mirzaev ilmiy-tadqiqot va o`quv-tajriba xonalarini ko`zdan kechirib, o`zlarini qiziqtirgan savollar bo`yicha mas`ullar bilan suhbatlashgan. Ayniqsa, filial huzurida tashkil etilgan “Gis-geomiks” ilmiy-o`quv va muhandislik markazida olib borilayotgan tadqiqot ishlariga alohida qiziqish bildirilgan.
Ma`lumotga ko`ra, hozirgi kunda Filial professor-o`qituvchilari tomonidan Respublikamiz kon-metallurgiya sanoati korxonalari muammolari yuzasidan jami 810 million so`mlik xo`jalik shartnomalari imzolangan va Innovasion rivojlanish vazirligi e`lon qilgan amaliy mavzu bo`yicha 1 milliard 288 million so`mlik ilmiy-tadqiqot ishlari bajarilmoqda. O`zbekiston ishlab chiqarish korxonalarida yuzaga kelayotgan ilmiy muammolar bo`yicha 1,5 milliard so`mdan ortiq ilmiy-tadqiqot ishlari bajarilishi rejalashtirilgani aytiladi.
Tashrif doirasida professor-o`qituvchilar va talabalar bilan uchrashuv o`tkazilgan. Unda talabalar o`zlarini qiziqtirgan barcha savollariga javob olgan.
"Eng izlanuvchan va intiluvchan yoshlarimiz dunyoning eng ilg`or tajribalarini borib o`zlashtirsin", – dedi Zoyir Mirzaev.
"Bu boradagi bilim va ko`nikmalarini o`zimizda tatbiq etsin. Shu bilan birga, yoshlar milliyligimiz va ma`naviyatimizni unutmasligi kerak. Mana shunday yoshlar uchun "Viloyat hokimi stipendiyasi"ni joriy etamiz",-deydi hokim.
Shuningdek, suhbat mobaynida innovasion g`oyalar uchun Innovasion rivojlanish vazirligi va texnologiyalar yo`nalishi bo`yicha OKMK AJning stipendiyalari berilishi bo`yicha dastur tayyorlanadigan bo`ldi.
