Toshkent viloyatining Quyi Chirchiq tumani, Surum mahallasi hududidagi daraxtzorlar qasddan yo`q qilinmoqda. Bu haqda Oliy Majlis Qonunchilik palatasi deputati, Ekologiya va atrof muhitni muxofaza qilish davlat qo`mitasi Jamoatchilik kengashi a`zosi Rasul Kusherbaev yozmoqda.
Ma`lum qilinishicha, O`rmon xo`jaligiga qarashli bo`lgan ushbu er maydoni 2019 yili tuman hokimligi zaxirasiga olingan.
"Shundan so`ng noqonuniy ravishda daraxtlar turli yo`llar bilan yoqilib, sun`iy yaroqsiz holga keltirilgan. So`ng maydondan shag`al olinib, pullanmoqda. Zo`r usul.
Taxminimizcha daraxtkushlar tomonidan shu kunga qadar ikki yuzga yaqin qimmatbaxo daraxtlar yo`q qilingan.
Achinarlisi bu ishlar aynan "moratoriy" davrida sodir etilishiga qaramay mas`ul tashkilotlar vaziyatni jim kuzatib turibdi. Katta ehtimol bilan daraxtkushlar ortida ularni qo`llovchi "kattalar" bor...
Prezidentimizning qonun ustuvor jazo muqarrar, degan da`vatidan kelib chiqib, mas`ul idoralar, shu jumladan ekologiya prokuraturasidan masalani tezkor o`rganib, chora ko`rishlarini so`raymiz", - deyiladi deputatning ijtimoiy tarmoqdagi shaxsiy sahifasida qoldirilgan postida.