O`zbekiston tashqi ishlar ishlar vazirligi rahbariyatining bevosita tashabbusi va Vazirlar Mahkamasi huzuridagi O`zbek tilini rivojlantirish jamg`armasi ko`magi bilan «Diplomatik terminlar izohli lug`ati» kitobi chop etildi, deb xabar bermoqda «Dunyo» AA.
Kitob Tashqi ishlar vazirligi huzuridagi Xalqaro munosabatlar bo`yicha axborot-tahliliy markazi xodimi Isroil Shamsimuhamedov tomonidan nashrga tayyorlangan.
Bugun, 17 fevral kuni Tashqi ishlar vazirligida ushbu izohli lug`atning taqdimoti o`tkazildi.
Anjuman ishtirokchilari «Diplomatik terminlar izohli lug`ati»ning mazmun-mohiyati hamda bugungi kundagi ahamiyati haqida so`z yuritdi. U o`zbek dilomatiyasi nutqining rivojiga xizmat qilishi bildirildi. Ushbu kitob soha xodimlari uchun muhim va amaliy qo`llanma ekani, unda jamlangan diplomatiya sohasi uchun juda muhim bo`lgan so`zlar, iboralar, ularning tavsiflari qayd etildi.
Lug`at keng diplomatlar ommasi, talabalar, tarjimonlar, OAV va ushbu sohaga qiziquvchilarga mo`ljallangan.
To`plamda 400 ga yaqmn iste`molda bo`lgan so`z va so`z birikmalari, xalqaro diplomatiya sohasidagi terminlar va xalqaro munosabatlarda keng qo`llanadigan so`z va atamalar jamlangan.
Taqdimotda so`nggi yillarda mamlakatimizning butun dunyoga tobora ochilib borayotgani bois o`zbek tilini o`rganishga bo`lgan qiziqish va talab ortayotgani ta`kidlandi. Shu bois bugungi kunda davr talablaridan kelib chiqqan holda tuzilgan ushbu lug`atga katta ehtiyoj sezilmoqda.
— Bu lug`at xalqaro munosabatlar terminologiyasi yo`nalishidagi ishlarimizning debochasi, – dedi Vazirlar Mahkamasi departamenti mas`ul xodimi G`ofir Hamroev. — Hali bu borada qiladigan ishlarimiz juda ko`p. Chunki, hozirga qadar tashqi siyosat bo`yicha o`zbek tilidagi lug`at yaratilmagan edi. O`zbekiston xalqaro diplomatiyasini rivojlantirishda ushbu sohaga oid o`zbek tilidagi atamalarni ishlab chiqish zaruriyati paydo bo`lmoqda. Qayd etish joizki, Tashqi ishlar vazirligi davlatimiz rahbari va hukumatimiz tomonidan o`zbek tilining nufuzini xalqaro maydonda oshirish bo`yicha qo`yilyotgan talablarni og`ishmay bajarmoqda.
Kitob muallifi Isroil Shamsimuhamedov lug`at tuzish mas`uliyatli jarayon ekani, shunday mazmundagi ko`proq kitoblarni nashrga tayyorlash zarurligini ta`kidladi.
— Vazirlar Mahkamasi va Tashqi ishlar vazirligi ko`magida dunyo yuzini ko`rgan ushbu kitobni yaratishga qarib ikki yil vaqt sarflandi, - dedi u. – Ish jarayonida bu boradagi xalqaro tajriba bilan chuqur tanishdik, Jahon iqtisodiyoti va diplomatiya universiteti professor-o`qituvchilari yaqindan yordam berdi. Lug`atdagi atamalarni tanlashda o`zbek tili mezonlari va til normalariga rioya qilindi.
Tadbir yakunida ishtirokchilar o`zlarini qiziqtirgan savollariga javob oldi.
