Ijtimoiy tarmoqlarda IIO xodimlarini tasvirga olib, ruxsatsiz ijtimoiy tarmoqlarga joylash, "Ko`cha bezorilari" va avtomaktablardagi o`qitish tizimi haqida IIV vaziri o`rinbosari, jamoat xavfsizligi departamenti boshlig`i polkovnik Abdullaev Bekmurod Tojimirzaevich intervyusi tarqalgan edi.
Oliy Majlisning quyi palatasi deputati Rasul Kusherbaev bunga o`z munosabati bildirdi.
" – Buni Prezident topshirig`i, deya talqin qilmoqda.
Lekin bizningcha bu ko`proq vazirlikning xohishi, balki Bekmurodov janoblarining o`zi istayapti.
Ularning istagi ayni vaqtda mantiqsiz, tenglik va demokratiya tamoyillariga zid hisoblanadi.
Chunki, ichki ishlar tizimi xodimlari birovning to`shagiga qadar kirib videoga olib, internetga tarqatganda yoki o`zlariga yoqmagan blogerni ushlab butun internetda "gey" qilib ko`satishga intilganda ham ular qonun oldida javob berganini ko`rmadik.
Tizim o`z xodimlarining "buzuq" va noqonuniy harakatlariga ko`z yumib kelayotgan bir vaqtda biz fuqarolarning biror bir ichki ishlar vakilining to`shagigacha kamera bilan kirgani yoki xodimni "gey"ga chiqarganini ham ko`rmadik.
Balki tasvirga olib tarqatish masalasida cheklovni ichki ishlar o`z tizimida kuchaytirishni o`ylab ko`rar. Chunki ularniki chegaradan o`tib ketmoqda.
Keyin xalqdan nimadir talab qilishdan avval inson o`zi xalqqa namuna bo`lishi kerak.
️Albatta biz bu kabi demokratiyaga zid, jamoatchilik nazoratini cheklaydigan qonunlar qabul qilinishiga qarshimiz", – deydi deputat.
