Farg`ona viloyat hokimi Xayrullo Bozorov, viloyat delegasiyasining Turkiyaga tashrifi doirasida Istanbulda Terminal Yapı kompaniyalar guruhi boshqaruv kengashi raisi Mexmet Delimollaoglu bilan uchrashib, Farg`ona xalqaro aeroportini davlat-xususiy sheriklik asosida modernizasiya qilish va boshqarish masalasini muhokama qildi. Bu haqda viloyat hokimligi Matbuot xizmati xabar bermoqda.
Boshqa sohalardagi yirik loyihalar bilan birga, hozirgacha dunyo bo`yicha 40 ta aeroportning qurilishi va modernizasiyasida ishtirok etgan, Kiprdagi Erjan xalqaro aeroportining boshqaruvini amalga oshiriyotgan Terminal Yapı kompaniyalar guruhi Farg`ona halqaro aeroportini boshqaruvga qabul qilib, ikki bosqichda investisiya loyihasini amalga oshirish, bunda dastlab qo`nish yo`li qoplamasini va elektr tizimini yangilash, mavjud terminalni rekonstruksiya qilish va kengaytirish, ikkinchi bosqichda qo`nish yo`lagini kengaytirish hamda yangi terminal qurish, besh yil muddatda aeroportda yillik yo`lovchilar oqimini 3 million nafarga etkazishni rejalashtirmoqda.
Shuningdek, loyiha doirasida aeroportda 200 tonnalik sovutkichli meva-sabzavot saqlash ombori ham barpo etilishi hamda zamonaviy yuk terminali faoliyati tashkillashtirilishi ham ko`zda tutilgan. Shu bilan birga, Farg`ona xalqaro aeroportida aviasiya sohasi mutaxassislarini tayyorlash ta`lim markazi tashkil etish ham loyihadan o`rin olgan.
Loyihaga birinchi yilda 15 million dollar, keyingi uch yilda 45 million dollar, jami 60 million dollar to`g`ridan to`g`ri xorijiy investisiya yo`naltirish rejalashtirilgan.
Xayrullo Bozorov, mamlakatimizda aeroportlarni davlat-xususiy sheriklik asosida rekonstruksiya, modernizasiya, ekspluatasiya qilish va boshqarish loyihalarini amalga oshirish bo`yicha aniq-chora tadbirlar belgilanganini ma`lum qilib, Farg`ona vodiysi uchun katta ahamiyatga ega bo`lgan ushbu loyihani qisqa muddatda mutasaddi organlar bilan hamkorlikda ko`rib chiqish hamda uni amalga oshirish bo`yicha har tomonlama ko`maklashishga tayyor ekanliklarini ma`lum qildi.
Terminal Yapı kompaniyalar guruhi Farg`ona viloyatida energetika sohasida, shu jumladan quyosh yoki geotermal elektrostansiyalarni qurish kabi loyihalarni amalga oshirish, yirik ko`chmas mulk ob`ektlari va turar joy majmualarini qurish, neftgaz va kimyo sohasiga investisiyalar kiritish va zamonaviy texnologiyalarni joriy qilish masalalariga ham katta qiziqish bildirdi.
Xayrullo Bozorov, Turkiyaning janubiy-sharqiy hududida, Istanbuldan 1000 km uzoqlikda joylashgan Shanliurfa shahriga borib, Terminal Yapı kompaniyalar guruhi tomonidan 2013 yilda qurib foydalanishga topshirilgan Şanlıurfa GAP aeroportini ko`zdan kechirdi.
Loyiha qiymati – 163 mln. dollar bo`lgan ushbu aeroportda yopiq binolar – 25 ming metr kvadratni, ochiq beton qoplamali maydon – 650 ming metr kvadratni tashkil etadi
Aeroportda uzunligi 4000, eni 60 metrlik qo`nish yo`li qurilgan. Loyiha doirasida taksi yo`laklari, avtoturargox, 100 tonnalik sovutkichli meva-sabzavot ombori, yuk va passajirlar terminal binolari, aeroport nazorat minorasi, qo`riqchilar, o`t o`chirish, bojxona xizmati binolari qurilib foydalanishga topshirilgan.
