Prezident Vladimir Zelenskiy Ukraina hududiy mudofaa xalqaro legioni tuzilganini e`lon qildi. Bu haqda Prezident devoni saytida xabar berildi.
“Evropa va dunyo xavfsizligini himoya qilishga qo`shilishni istagan har bir kishi kelib, ukrainaliklar bilan XXI-asr bosqinchilariga qarshi yonma-yon turishi mumkin”, dedi Zelenskiy.
Ukrainaliklarga qo`shilishni xohlovchi xorijliklarga davlat tomonidan hududiy mudofaa kuchlari safiga qo`shilish taklif etiladi.
Ukraina Prezidentining 2016 yil 10 iyundagi 248-son qarori bilan tasdiqlangan xorijliklar va fuqaroligi bo`lmagan shaxslarning Ukraina Qurolli Kuchlarida harbiy xizmatni o`tashi to`g`risidagi nizomga ko`ra, chet elliklar ixtiyoriy ravishda Ukraina Qurolli Kuchlariga shartnoma asosida harbiy xizmatni o`tashlari mumkin.
Ta`kidlanishicha, xalqaro legionga yozilish istagidagilar o`zlari yashayotgan mamlakatdagi Ukraina elchixonalari bilan bog`lanishlari kerak bo`ladi.
2015-yilda Oliy Rada xorijliklarga Ukraina Qurolli kuchlarida xizmat qilishiga ruxsat beruvchi qonunni qabul qilgan.
2016-yil iyun oyida tegishli farmonni o`sha paytdagi prezident Pyotr Poroshenko imzolagan edi.
