Avvalroq Ukraina atrofidagi vaziyatlar bo`yicha muzokaralar olib borish uchun Rossiya delegasiyasi Belarusning Gomel shahrida Ukrain delegatlarini kutayotgani haqda xabar bergandik.
Biroq Zelenskiy Rossiya bilan muzokaralarni Belarusda o`tkazmasligini aytdi. U yo`llagan murojaatida Belarus hududidan Ukrainaga hujum bo`lganini, shu sababli Belarusda muzokaralar o`tkazilmasligini ta`kidlagandi.
Biroz vaqtdan so`ng Ukraina rahbari muzokaralar yuzasidan Lukashenko bilan suhbatlashganini ma`lum qildi.
"Biz Ukraina delegasiyasining Rossiya delegasiyasi bilan Ukraina-Belarus chegarasida hech qanday shartlarsiz uchrashishi bo`yicha kelishib oldik",-deydi u ijtimoiy tarmoqlardagi sahifasida.
Kelishiuvga ko`ra, delegatlar Belarus-Ukraina chegarasida, Pripyat daryosi yaqinida uchrashadi.
"Lukashenko Ukraina delegasiyasining tashrifi, muzokaralari va qaytishi vaqtida Belarus hududida joylashgan barcha samolyotlar, vertolyotlar va raketalarning erda qolishi uchun javobgarlikni o`z zimmasiga oldi",-dedi Zelenskiy.
