O`zbekiston bilan Isroil Davlati o`rtasida 1992 yilning 21 fevralida diplomatik munosabatlar o`rnatilgan bo`lib, har ikki davlatda elchixonalar o`z faoliyatlarini olib bormoqda. So`nggi yillarda O`zbekiston-Isroil munosabatlarida faol tendensiya kuzatilib, serqirra va istiqbolli o`zaro hamkorlik kengayib bormoqda.
Ikki tomonlama do`stlik va hamkorlik munosabatlarini mustahkamlash maqsadida O`zbekiston Respublikasi va Isroil Davlati o`rtasida diplomatik aloqalar o`rnatilganining 30 yilligini nishonlash doirasida O`zbekiston Respublikasining Isroil Davlatidagi Elchixonasining tashabbusiga ko`ra O`zbekiston Respublikasi “O`zarxiv” agentligi, O`zbekiston tarixi Davlat muzeyi va O`zbekiston yahudiylar milliy madaniy markazi bilan hamkorlikda joriy yil 26-30 mart kunlari O`zbekiston tarixi Davlat muzeyida “O`zbekistonda yahudiylar hayoti: tarixiy davrlar kesimida” mavzusidagi ko`rgazma o`tkazilmoqda.
Ko`rgazmada “O`zarxiv” agentligi va O`zbekiston tarixi Davlat muzeyi tomonidan 66 ta kinofotofono hujjatlari va materiallari, shuningdek, O`zbekiston yahudiylar milliy madaniy markazining bir qator eksponatlari namoyish etilayotgan bo`lib, unda O`zbekiston-Isroil munosabatlarining rivojlanishi, yangi O`zbekiston hududida yahudiy xalqi tarixi va madaniy hayoti yoritib berilmoqda.
Ko`rgazma o`z ishini bugun, 26 mart kuni boshladi. Ochilish marosimida “O`zarxiv” agentligi, O`zbekiston tarixi Davlat muzeyi, O`zbekiston Respublikasi Vazirlar Mahkamasi huzuridagi Millatlararo munosabatlar va xorijiy mamlakatlar bilan do`stlik aloqalari qo`mitasi, “O`zbekiston-Isroil” do`stlik jamiyati, O`zbekiston yahudiylar milliy madaniy markazi, hamkor tashkilotlar, ommaviy axborot vositalari vakillari ishtirok etdi.
Ma`lumot uchun, ko`rgazma o`z ishini 30 mart kuniga qadar davom ettiradi.
