Ijtimoiy tarmoqlarda Toshkentda “Tracker Primier” haydovchisi tomonidan IIBB xodimini urib ketgani aks etgan YTH videosi tarqalmoqda.
Videoda “Tracker Primier” haydovchisi o`zidan oldin harakatlanayotgan fuqaro Sh. U. ning boshqaruvida bo`lgan “Cobalt” mashinasini o`ng tomondan quvib o`tayotgan vaqtda to`qnashib ketadi va shu joyda o`z xizmat vazifasini olib borayotgan Toshkent shahar IIBB Yo`l harakati xavfsizligi boshqarmasi bo`linmalari Yo`l-patrul xizmati brigadasi Yo`l-patrul xizmati 3-bataloni 6-safarbarlik guruh YPX inspektori A. A. ni urib yuborgan.
Toshkent shahar IIBB matbuot xizmati holat yuzasidan ma`lumot bergan edi.
Toshkent shahar sudlari Matbuot xizmatining rasmiy bayonotiga ko`ra, 2022 yil 7 aprel kuni jinoyat ishlari bo`yicha Yunusobod tuman sudida “Tracker Primier” haydovchisi haydovchisi K. U. (1989 yil Toshkent shahrida tug`ilgan, Halq ta`limi vazirligi qoshidagi “Innovasiya, texnologiya va strategiya markazi” DUK haydovchisi, muqaddam sudlanmagan) ga nisbatan jinoyat ishi ko`rib chiqish bo`yicha sud jarayoni yakuniga etib, sud hukmi e`lon qilingan.
E`lon qilingan sud hukmiga ko`ra, sudlanuvchi Jinoyat kodeksining 266-moddasi (transport vositalari harakati yoki ulardan foydalanish xavfsizligi qoidalarini buzish) 1-qismida nazarda tutilgan jinoyatni sodir etganlikda aybli deb topilib, unga ish haqining 15 foizi miqdorini davlat daromadi hisobiga ushlab qolgan holda 2 yil muddatga axloq tuzatish ishlari jazosi tayinlangan.
Shuningdek, Halq ta`limi vazirligi qoshidagi “Innovasiya, texnologiya va strategiya markazi” DUK hisobidan fuqaroviy da`vogar Sh. U. foydasiga 15 469 100 so`m, jabrlanuvchi A. A. foydasiga jami 4 060 002 so`m etkazilgan moddiy zarar undirilishi belgilangan.
2022 yil 25 aprel kuni sudlanuvchi tomonidan chiqarilgan hukm ustidan apellyasiya tartibida shikoyat berilib, ayni paytda ushbu shikoyat Toshkent shahar sudining jinoyat ishlari bo`yicha sudlov hay`ati apellyasiya instansiyasida ko`rish uchun rasmiylashtirimoqda.
Apellyasiya shikoyatini ko`rib chiqish yakuni bo`yicha qo`shimcha axborot beriladi, - deyiladi Toshkent shahar sudlari Matbuot xizmatining rasmiy bayonotida.
