Ayni paytda “Hilton Tashkent City” mehmonxonasida Shanxay hamkorlik tashkilotiga a’zo davlatlarning turizm sohalari vakillari ishtirokida yig‘ilish bo‘lib o‘tmoqda, deya xabar bermoqda "darakchi.uz" muxbiri.
Ertaga, 20 may kuni akademik va ishbilarmon doiralar, shuningdek, tashkilotga a’zo davlatlarning turizm sohasi vakillari ishtirokida “SHHTga a’zo davlatlar o‘rtasidagi hamkorlikning yangi bosqichi: turizm va madaniy meros” nomi ostidagi turistik forum bo‘lib o‘tadi.
Ma’lum qilinishicha, ushbu forum 2022 yil 15-16 sentyabr kunlari Samarqand shahrida bo‘lib o‘tadigan Shanxay hamkorlik tashkilotining navbatdagi sammiti doirasida tashkil etildi.
Forumda SHHTga a’zo davlatlar: Hindiston, Qozog‘iston, Xitoy, Qirg‘iziston, Pokiston, Rossiya, Tojikiston va O‘zbekistonning turizm sohalari rahbarlari, shuningdek, turizmni rivojlantirish va madaniy merosni asrab-avaylash bo‘yicha xalqaro ekspertlar, turli vazirliklar rahbarlari, ommaviy axborot vositalari vakillari va faxriy mehmonlar ishtirok etmoqda.
Forumning asosiy maqsadlari a’zo davlatlar o‘rtasida turizm sohasidagi hamkorlik, ishonch, do‘stlik va yaxshi qo‘shnichilik munosabatlarini mustahkamlash vazifalari; savdo-iqtisodiy hamkorlikni rivojlantirish, tinchlik va xavfsizlikni mustahkamlash; madaniy va tarixiy ob’ektlarni saqlash va saqlash; SHHTga a’zo davlatlarning turizm salohiyatini ilgari surish.
Yig‘ilishda O‘zbekiston Respublikasi Bosh vazirining o‘rinbosari, Turizm va madaniy meros vaziri Aziz Abduhakimov va SHHT Bosh kotibi Chjan Ming tabrik so‘zi bilan chiqdi.
“Yil sayin rivojlanib borayotgan sayyohlik industriyasini davlatlar milliy iqtisodiyotning muhim segmenti va davlat raqobatbardoshligini oshirishning strategik rag‘bati sifatida baholamoqda. Mamlakat rahbarining faol va har tomonlama qo‘llab-quvvatlashi tufayli O‘zbekiston turizm bozori xalqaro sayyohlarni qabul qilish uchun o‘z eshiklarini keng ochdi. Qisqa vaqt ichida O‘zbekistonga vizasiz kirib chiquvchi davlatlar soni 9 tadan 92 taga ko‘paydi. SHHT davlatlari bilan turizm aloqalarini yanada rivojlantirish biz uchun ustuvor yo‘nalishdir. Sayyoramizning jami aholisining 44 foizini qamrab olgan SHHT hududi salohiyati to‘liq ishga solinmagan ulkan turizm bozoridir. Misol tariqasida 2019 yilda SHHT davlatlaridan 250 millionga yaqin sayyoh xorijda dam olish uchun ketganini keltirishimiz mumkin. (Hindiston 27 million, Xitoy 155 million, O‘zbekiston 1,7 million, Qozog‘iston 206 ming, Tojikiston 31 ming, Rossiya 20 million). Biz barcha kuchlarni birlashtirib, bu oqimni, birinchi navbatda, “SHHTning ichki turizmi”ni rivojlantirishga yo‘naltirishimiz kerak”, - deb aytib o‘tdi Aziz Abduhakimov.
Forumda onlayn formatda ishtirok etgan SHHT Bosh kotibi Chjan Min bugungi kunda tashkilot oldida turizm sohasidagi hamkorlikni sifat jihatidan yangi, yuqori bosqichga ko‘tarish vazifasi turganini ta’kidlar ekan, buning uchun barcha zarur shart-sharoit va imkoniyatlar mavjudligini qayd etdi. Shu nuqtai nazardan, SHHT doirasida ko‘p qirrali sheriklikni rivojlantirish bo‘yicha SHHT davlatlari rahbarlari tomonidan belgilangan kelishuv va vazifalarni amalga oshirish uchun idoralararo doimiy va bevosita aloqalar muhimligi alohida ta’kidlandi.
