2022 yilning 3-6 iyul kunlari ICESCO bosh qarorgohida (Marokko qirolligi, Rabot shahri) ICESCO islom olamining 10-sessiyasi bo`lib o`tdi.
O`zbekiston Turizm va madaniy meros vazirligi huzuridagi Madaniy meros agentligining xabar berishicha, mazkur sessiyada Buxoroda joylashgan 7 ta madaniy meros ob`ektlari Islom olami madaniy merosi ro`yxatiga olinib, sertifikatlar topshirildi.
Ismoil Somoniy maqbarasi, Chor Bakr, Bahouddin Naqshband majmualari, Mag`oki Attor masjidi, Poyi kalon ansambli, qadimgi Poykent shahri qoldiqlari va Toshsaroy madrasasiga tegishli sertifikatlar ICESCO Bosh direktori Salim Al Malik tomonidan topshirildi.
Yurtimiz tarixiga oid obidalarning ICESCO ro`yxatiga olinishi boy madaniy merosimizni butun dunyoga targ`ib etishda, xususan, Islom olamida madaniyatimiz yanada tanilishida katta ahamiyat kasb etadi. O`zbekiston hududi tarixan Islom rivojiga katta hissa qo`shgan o`lka hisoblanadi.
Madaniy meros agentligi yurtimizdagi boy madaniy meros ob`ektlarini, xususan dinimiz va madaniyatimiz rivojida katta o`rin tutgan obidalar targ`ibotini yuritish hamda madaniy merosni saqlashda xalqaro grantlarni jalb etish uchun islomshunos olimlar ishtirokida xalqaro konferensiya va amaliy uchrashuvlar tashkil etishni rejalashtirgan.