2022 йилнинг 3-6 июль кунлари ICESCO бош қароргоҳида (Марокко қироллиги, Работ шаҳри) ICESCO ислом оламининг 10-сессияси бўлиб ўтди.
Ўзбекистон Туризм ва маданий мерос вазирлиги ҳузуридаги Маданий мерос агентлигининг хабар беришича, мазкур сессияда Бухорода жойлашган 7 та маданий мерос объэктлари Ислом олами маданий мероси рўйхатига олиниб, сертификатлар топширилди.
Исмоил Сомоний мақбараси, Чор Бакр, Баҳоуддин Нақшбанд мажмуалари, Мағоки Аттор масжиди, Пойи калон ансамбли, қадимги Пойкент шаҳри қолдиқлари ва Тошсарой мадрасасига тегишли сертификатлар ICESCO Бош директори Салим Ал Малик томонидан топширилди.
Юртимиз тарихига оид обидаларнинг ICESCO рўйхатига олиниши бой маданий меросимизни бутун дунёга тарғиб этишда, хусусан, Ислом оламида маданиятимиз янада танилишида катта аҳамият касб этади. Ўзбекистон ҳудуди тарихан Ислом ривожига катта ҳисса қўшган ўлка ҳисобланади.
Маданий мерос агентлиги юртимиздаги бой маданий мерос объэктларини, хусусан динимиз ва маданиятимиз ривожида катта ўрин тутган обидалар тарғиботини юритиш ҳамда маданий меросни сақлашда халқаро грантларни жалб этиш учун исломшунос олимлар иштирокида халқаро конференция ва амалий учрашувлар ташкил этишни режалаштирган.
