Poytaxtdagi Kinochilar uyida Kinematografiya agentligi va Milliy kinematografiyani rivojlantirish markazi hamkorligida "Vatan yagonadir" badiiy kechasi tashkil etildi. Bu haqda Kinematografiya agentligi Axborot xizmati xabar qildi.
Tadbirni Agentlik bosh direktori birinchi o`rinbosari Shuhrat Rizaev ochib berdi va vatanparvarlik mavzusidagi filmlar haqida to`xtalib o`tdi. Shuningdek, bir qator mehmonlar so`zga chiqib, o`zbek kinosidagi ijobiy o`zgarishlar, ayniqsa harbiy mavzudagi film hamda seriallarga bo`lgan e`tibor kuchayganini e`tirof etishdi.
Tadbir davomida Ichki ishlar vazirligi ashula va raqs ansambli ijrosida kuy-qo`shiqlar ijro etildi.
So`ngra tomoshabinlar uchun rejissyor Hilol Nasimov tomonidan suratga olingan “Vatan ostonasi” badiiy filmi namoyish etildi.
Mazkur kinokartinada chegarachilar hayoti va faoliyati haqida hikoya qilinadi. Shuningdek, film voqealari zamirida bag`rikenglik, tinchlik, qo`shni davlatlar bilan do`stona munosabat kabi mavzular o`rin olgan.