Cal avval Qashqadaryoda fuqaro o`z ustiga benzin sepib yoqib yuborgani haqida xabar bergandik.
Shuningdek, Bosh prokuratura Matbuot xizmati hozirda holat bo`yicha Qarshi shahar prokuraturasi tomonidan tergovga qadar tekshirish harakatlari olib borilayotganini e`lon qilgandi.
Qashqadaryo viloyati Ekologiya boshqarmasi axborot xizmati ayni paytda hodisa fuqaro norozi bo`lgan korxona faoliyati to`g`risida batafsil ma`lumot berdi.
Qayd etilishicha, Qashqadaryo viloyati Qarshi shahridagi “Qarshi Leather” MChJ shaklidagi xorijiy korxonasida ekologiya xodimlari tomonidan muntazam ravishda faoliyatini tasdiqlangan dastur asosida tabiatni muhofaza qilish va tabiiy resurslardan oqilona foydalanishga oid qonun va normativ huquqiy hujjatlar talablarini ijrosini ta`minlash yuzasidan o`rnatilgan tartibda tegishli ruxsatnomalar asosida o`rganish ishlari olib borilgan.
2021 yilning mart oyida Iqtisodiy sudning hal qiluv qarori asosida Qarshi shahridagi MChJ shaklidagi xorijiy korxonasiga kiritilgan da`vo arizasi bo`yicha o`tkazilgan o`rganishlar natijasida atrof tabiiy muhitnni ifloslantirganlik holati aniqlanib, 284,0 mln so`m miqdorida majburiy kompensasiya to`lovlari undirish bo`yicha qaror qabul qilingan.
Berilgan ekologik ekspertiza xulosasi talablarining bajarilishi, ifloslantiruvchi moddalarni me`yor darajasidan yuqori chiqqanligi va o`rnatilgan talablariga rioya etilmaganligi bo`yicha aniqlangan kamchiliklar va atrof tabiiy muhitni ifloslantirganlik uchun keyingi o`rganishlarda 346,0 mln so`m miqdorida ma`muriy kompensasiya to`lovi ham hisoblangan.
O`rganishlar yakunida amaldagi qonunlarga to`la rioya etish bo`yicha bir necha bor majburiy ko`rsatmalar berilgani aytiladi.
2021 yil noyabr oyida viloyat Ekologiya boshqarmasi tomonidan Iqtisodiy sudga mazkur xorijiy korxonaning faoliyatidagi kamchiliklarni bartaraf etgunga qadar vaqtincha to`xtatish masalasida ariza kiritilgan.
“Qarshi Leather” MChJ shaklidagi xorijiy korxonasi rahbarining 2022 yil mart oyidagi viloyat ekologiya boshqarmasiga yuborgan xatida korxona Xitoy davlat investorlari tomonidan 2022 yil 1 mart kunidan noma`lum muddatga to`xtatilganligi, korxonaning suvlarini kanalizasiya quvuriga qo`yish bo`yicha biror bir to`siq va ta`qiqlar bo`lsa ular tomonidan kiritilgan investisiya mablag`larini olib chiqib ketish hamda korxona faoliyatini butunlay to`xtatilishi ma`lum qilinib, korxonaning ish faoliyatini qayta tiklash uchun Qarshi shahar kanalizasiya quvurining g`arbiy nuqtasiga chiqindi oqova suvlarini quyishni ma`lum qilgani ta`kidlab o`tiladi.
Shuningdek 2021 yil oktyabr oyida mazkur MChJ shaklidagi xorijiy korxonadan aholi yashash maskanlariga yaqin bo`lgan juda katta maydonga noqonuniy tashlangan chiqindi oqova suvlarini tozalash uchun viloyat hokimligi, viloyat IIB, viloyat Ekologiya boshqarmasidan ishchi guruh tuzilib, chiqindi suvlari tashlangan zovurlar katta mablag` hisobiga to`liq tozalanib, ushbu zovur tuproq bilan ko`mib tashlangan. Hozirda mazkur joylar obodonlashtirilib, hattoki futbol maydonchalari tashkil etilgan.
