Bugun Madaniyat vazirligida "Botir Zokirov nomidagi zamonaviy estrada qo`shiqchilari" respublika ko`rik-tanlovining g`oliblarini taqdirlash marosimi bo`lib o`tdi.
O`zbek estradasi asoschisi Botir Zokirov xotirasiga bag`ishlangan mazkur ko`rik-tanlovning tuman-shahar bosqichlarida ishtirok etganjami 2 000 nafar ishtirokchilardan tanlovning hududiy saralash bosqichlarida 420 nafar iqtidorli va ijodkor yoshlar saralab olingan. Yakuniy saralash bosqichiga hakamlar hay`ati tomonidan tanlab olingan 45 nafar eng iqtidorli yoshlar “Turkiston” san`at saroyida o`zlarining san`atlarini namoyish etishdi.
Ular orasidan esa 3 nafar ishtirokchi g`olib sifatida saralanib, bugungi marosimda taqdirlanishdi. Ko`rik-tanlovning yakuniy xulosasiga ko`ra:
1-o`rin – 30 mln. so`m, diplom va maxsus statuetka sovrini Qaytmasbek Ahmedovga;
2-o`rin – 21 mln. so`m, diplom va maxsus statuetka Sevara To`lanovaga;
3-o`rin – 15 mln. so`m, diplom va maxsus statuetka Jasurbek G`aybullaevga nasib etdi.
Ammo ko`rik-tanlov shartlarida belgilangan grand-pri sovrini egasiz qoldi.
“Nima uchun grand-pri sovrini bo`lmadi?” – degan savollarni berishyapti. Bunga sabab — ishtirokchilarga qo`yilgan talab yuqori. Qatnashchilar ijodiy marralarni juda baland olishlari kerak. Biz hakamlar hay`ati a`zolari bilan shu to`xtamga keldikki, hali grand-priga loyiq ijrochilar bo`lmadi”, - dedi O`zbekiston xalq artisti, ko`rik-tanlov hakamlar hay`ati raisi Farrux Zokirov.
U shuningdek, g`oliblarning ijrosiga ham umumiy qilib aytganda “4” baho qo`yganini aytdi hamda: “Faqatgina ovoz bilan bu yutuqqa erishib bo`lmaydi. Ishtirokchilar Botir Zokirovning hayoti va ijodi, sahnada o`zini tutish madaniyati bo`yicha ham bilimga ega bo`lishlari talab etiladi. Men o`ylaymanki, O`zbekistonimizda iste`dodlar juda ko`p. Keyingi tanlovlarda albatta grand-pri sovrindorlari ham bo`ladi. Barcha ijodkorlarga ijodiy zafarlar tilayman”, - deya qo`shimcha qildi.
Sardorbek Rahmonqulov
