Фаррух Зокиров Ботир Зокировнинг хотирасига бағишланган танлов ғолиблари ижросига “4” баҳо қўйди

МАДАНИЯТ 14.11.2022, 20:54
Фаррух Зокиров Ботир Зокировнинг хотирасига бағишланган танлов ғолиблари ижросига “4” баҳо қўйди

Бугун Маданият вазирлигида "Ботир Зокиров номидаги замонавий эстрада қўшиқчилари" республика кўрик-танловининг ғолибларини тақдирлаш маросими бўлиб ўтди.

Ўзбек эстрадаси асосчиси Ботир Зокиров хотирасига бағишланган мазкур кўрик-танловнинг туман-шаҳар босқичларида иштирок этганжами 2 000 нафар иштирокчилардан танловнинг ҳудудий саралаш босқичларида 420 нафар иқтидорли ва ижодкор ёшлар саралаб олинган. Якуний саралаш босқичига ҳакамлар ҳайъати томонидан танлаб олинган 45 нафар энг иқтидорли ёшлар “Туркистон” санъат саройида ўзларининг санъатларини намойиш этишди.

Улар орасидан эса 3 нафар иштирокчи ғолиб сифатида сараланиб, бугунги маросимда тақдирланишди. Кўрик-танловнинг якуний хулосасига кўра:

1-ўрин – 30 млн. сўм, диплом ва махсус статуэтка соврини Қайтмасбек Аҳмедовга;

2-ўрин – 21 млн. сўм, диплом ва махсус статуэтка Севара Тўлановага;

3-ўрин – 15 млн. сўм, диплом ва махсус статуэтка Жасурбек Ғайбуллаевга насиб этди.

Аммо кўрик-танлов шартларида белгиланган гранд-при соврини эгасиз қолди. 

“Нима учун гранд-при соврини бўлмади?” – деган саволларни беришяпти. Бунга сабаб — иштирокчиларга қўйилган талаб юқори. Қатнашчилар ижодий марраларни жуда баланд олишлари керак. Биз ҳакамлар ҳайъати аъзолари билан шу тўхтамга келдикки, ҳали гранд-прига лойиқ ижрочилар бўлмади”, - деди Ўзбекистон халқ артисти, кўрик-танлов ҳакамлар ҳайъати раиси Фаррух Зокиров. 

У шунингдек, ғолибларнинг ижросига ҳам умумий қилиб айтганда “4” баҳо қўйганини айтди ҳамда: “Фақатгина овоз билан бу ютуққа эришиб бўлмайди. Иштирокчилар Ботир Зокировнинг ҳаёти ва ижоди, саҳнада ўзини тутиш маданияти бўйича ҳам билимга эга бўлишлари талаб этилади. Мен ўйлайманки, Ўзбекистонимизда истеъдодлар жуда кўп. Кейинги танловларда албатта гранд-при совриндорлари ҳам бўлади. Барча ижодкорларга ижодий зафарлар тилайман”, - дея қўшимча қилди.

 

Сардорбек Раҳмонқулов

Шарҳлар

Об-ҳаво: Тошкент
Валюта курси
1