Bishkekning Pervomayskiy tuman sudi 2010 yil iyun voqealari bo`yicha jinoyat ishini ko`rishda davom etmoqda. Bu haqda "24.kg" xabar qildi.
Dastlab sudga sobiq prezident Almazbek Atambaev keltirildi.
Sudga Milliy xavfsizlik davlat qo`mitasining sobiq rahbari Keneshbek Duyshebaev va Jalolobod viloyatining sobiq hokimi Bektur Asanov ham keltirilgan.
Sobiq davlat rahbari tartibni buzgani uchun sud zalidan olib chiqildi.
Yig`ilishda ayblanuvchi Keneshbek Duyshebaev prezident Sadir Japarov, Milliy xavfsizlik davlat qo`mitasi rahbari Qamchibek Tashiev va parlamentning sobiq spikeri Talant Mamitovni guvoh sifatida sudga chaqirish bo`yicha iltimosnoma kiritdi.
Bundan tashqari, Keneshbek Duyshebaevga ko`ra, sud sobiq davlat rahbari Almazbek Atamboevsiz o`tishi mumkin emas. Unga ko`ra, agar sobiq prezident ko`rsatma bermasa, u ham bu huquqidan voz kechadi.
Sudya Chingizbek Berdimuratov ayblanuvchining iltimosnomasini qisman qanoatlantirdi. Unga ko`ra, sudga Sadir Japarov, Qamchibek Tashiev va Talant Mamitov chaqirildi. Ular guvoh sifatida so`roq qilinadi.
Chingizbek Berdimuratovning eslashicha, tergov jarayonida uchalasi ham so`roq qilingan. Bundan tashqari, sobiq deputat Axmatbek Keldibekov sudga chaqiriladi.
Ma`lumot uchun: 2010 yil iyun voqealari bo`yicha jinoiy ish bo`yicha tergov 2021 yil aprel oyida qayta boshlangan. Mazkur holat yuzasidan Qirg`iziston Respublikasi Jinoyat kodeksining “Xizmat vakolatini suiiste`mol qilish” moddasi bo`yicha tergov harakatlari olib borilmoqda. Muvaqqat hukumat mansabdor shaxslariga nisbatan 2010 yilning may-iyun oylarida respublika janubida fojiali oqibatlarga olib kelgan sabablardan biri bo`lgan taniqli Qodirjon Botirovning mamlakatdan to`siqlarsiz noqonuniy chiqib ketishiga ko`maklashganlik fakti bo`yicha ish qo`zg`atilgan.
