Yangi Namangan tumani hokimi Jobir Abdullaevning ijtimoiy tarmoqlarda joylangan telefon orqali yozib olingan audio suhbati qizg`in muhokamalarga sabab bo`lgan edi. Hokim mazkur audioyozuvda tadbirkorni qo`pol so`zlar bilan haqorat qilgan.
Viloyat hokimi Shavkatjon Abdurazakov boshchiligida selektor tartibida o`tkazilgan yig`ilishida Yangi Namangan tumani hokimi J.Abdullaevga “Hayfsan” intizomiy jazosi qo`llanilib, barcha turdagi rag`batlantirishlardan mahrum qilindi.
- Bugun jahon miqyosida yurtimiz haqida so`z ketganda, “Yangi O`zbekiston” iborasi tilga olinib, yangi bosqichdagi islohotlarda viloyatimizning hissasi o`z mevalarini bera boshlayotgan, erishayotgan yutuqlarimiz muhtaram Prezidentimiz tomonidan alohida e`tirof etilayotgan, qolaversa bizga yuksak ishonch bildirib turilgan bir vaqtda shahrimizni sanoat, tadbirkorlik va kichik biznes asosiy drayver bo`lgan Yangi Namangan tumani rahbarining bu harakatlarini aslo oqlab bo`lmaydi! - degan hokim.
Shuningdek, joriy yil davomida ijtimoiy tarmoqlarda shahar va tumanlar hokimliklari, viloyat boshqarmalari, tegishli tashkilotlar rahbarlarining xatti-harakatlari bo`yicha yoritilgan masalalar ham atroflicha muhokama qilingan.
