Bu haqda Turizm va madaniy meros vazirligi Matbuot xizmati xabar berdi.
2022 yilgi jahon chempionati doirasida Fransiya – Daniya uchrashuvi bo`lib o`tmoqda. O`yinning 86-daqiqasi. Hisob 1-1. Har ikki jamoaga ham g`alaba suv va havodek zarur. Ayni shu daqiqada Fransiya terma jamoasi hujumchisi Kilian Mbappe Daniya darvozasiga to`p kiritdi. Bu g`alaba goli edi va Mbappe uni O`zbekiston bayrog`i fonida nishonladi.
E`tiborlisi shundaki, shu kuni uchrashuvni stadionning o`zida qariyb 42 860 nafar, televizor qarshisida esa millionlab muxlislar tomosha qilishayotgan edi. Mbappening golini birga nishonlagan muxlislar, tabiiyki, O`zbekiston bayrog`iga e`tibor qaratishdi. Shuningdek, Kilian bayrog`imiz fonida tushgan suratini 75,2 million nafar kuzatuvchisi bo`lgan instagramdagi sahifasiga joylashtirdi. Bu voqeadan keyin O`zbekiston, uning aholisi, futbol muxlislari va bayrog`iga qiziqish yanada ortdi. Xususan, aynan Mbappe va bayroq voqeasidan keyin Fransiyaning eng mashhur kanallaridan biri hisoblangan “TF1” o`zbekistonlik futbol muxlislari va bayrog`imiz haqida maxsus reportaj tayyorladi. Reportajda fransiyalik jurnalist O`zbekistonda xizmat ko`rsatgan yoshlar murabbiyi Abdurahmon Fozilov bilan birga tomoshabinlarga o`zbekistonlik futbol ishqibozlari, bayrog`imiz va boshqa jihatlar haqida ma`lumot berdi.
Ma`lumot uchun, “TF1” qisqartmasi bilan mashhur bo`lgan va odatda La Une nomi bilan ataladigan "French Television 1" birinchi va eng qadimgi fransuz milliy telekanali hisoblanadi. U tomoshabinlar soni bo`yicha Fransiya va hatto Evropada yuqori o`rinlarda turadi.
Shu o`rinda qayd etish joizki, O`zbekistonning turizm salohiyatini targ`ib qilish maqsadida Qatarga yo`l olgan delegasiyamiz a`zosi Abdurahmon Fozilov Mbappeni O`zbekiston bayrog`i bilan “uchrashtirgan”.
Ayni damda mazkur delegasiya Turizm va madaniy meros vazirligi qo`llab-quvvatlashi ostida Qatarda millionlab muxlislar oldida yurtimizni yana-da ko`proq tanitish maqsadida targ`ibot ishlarini davom ettirishmoqda.
Ta`kidlash lozimki, nufuzli xalqaro musobaqalardan targ`ibot, reklama maydoni sifatida foydalanish xalqaro tajribada ko`p bora kuzatiladi. Ayni damda ham eng tomoshabop sport turlari — futbol, boks, tennis, UFS va boshqalar, albatta, turli targ`ibotlarsiz, reklamalarsiz o`tmaydi. Negaki millionlab muxlislarni bir joyga to`plagan turnir targ`ibot uchun eng samarali maydonlardan biri hisoblanadi.
