"Sud-ekspertlik faoliyatini tartibga soluvchi ayrim normativ-huquqiy hujjatlarni tasdiqlash to`g`risida"gi Hukumat qarori qabul qilindi. Bu haqda "Huquqiy axborot" xabar berdi.
Qaror bilan sud ekspertlarining faoliyatini reyting tizimida baholab borish to`g`risidagi namunaviy nizom tasdiqlandi. Shuningdek, mazkur nizom quyidagilarni belgilaydi:
- sud ekspertlarini reyting tizimida baholash va baholash mezonlari;
- reyting natijalari bo`yicha sud ekspertlarini rag`batlantirish, rag`batlantirishni kamaytirish yoki bekor qilish yoki intizomiy jazo qo`llash;
- reyting ko`rsatkichlari yuqori sud ekspertlarining ishini ommalashtirish.
Bundan tashqari, qaror bilan Adliya vazirligi huzuridagi sud ekspertlik faoliyatini rivojlantirishni qo`llab-quvvatlash jamg`armasi faoliyatiga oid nizom ham tasdiqlandi. Qayd etilishicha, davlat sud-ekspertiza muassasalariga ularning byudjetdan tashqari jamg`armalaridan 50 foizgacha qismini xodimlarni ijtimoiy himoya qilish va moddiy rag`batlantirsh uchun sarflashga ruxsat beriladi.
