Bugun O`zbekiston tasviriy san`at galereyasida qozoq adibi va mutafakkiri Abay Qo`nonboev hayoti va ijodiga bag`ishlangan "Abay. Qardosh xalqlar merosi" ko`rgazmasining ochilishi bo`lib o`tdi. Tadbirni Bosh vazir o`rinbosari – Turizm va madaniy meros vaziri Aziz Abduhakimov ochib berdi.
"Ushbu tadbir, O`zbekiston va Qozog`iston o`rtasida do`stlik rishtalarining yanada mustahkamlanib borayotganidan dalolat beradi. Bugun o`z eshiklarini ochayotgan ushbu ko`rgazma buyuk mutafakkir Alisher Navoiy insonparvarlik an`analarini o`zida saqlagan Abay ijodini yanada mukammal anglash imkonini berishiga ishonchimiz komil. Uning barcha xalqlar tinchlik va farovonlikda yashashi kerakligi, Sharq va G`arb uyg`unligi, jahon merosini o`zlashtirish zarurati, ensiklopedizmga intilish, inson tabiatining mukammallashuviga oid g`oyalari bugunga kelib ham o`z ahamiyatini yo`qotmagan», - deya ta`kidladi Aziz Abduhakimov.
Ko`rgazmada shuningdek qozog`istonliklarning kundalik maishiy hayotida foydalanuvchi, dekorativ-amaliy san`at buyumlari, Abay hayoti va ijodiga bag`ishlangan tasviriy san`at asarlari, grafiklari, shuningdek Abayning asarlari namoyish etilmoqda.
"Alisher Navoiy va Abay ijodi nafaqat turkiy, balki umuminsoniy qadriyatlarning shakllanishi namunasini o`zida mujassam etgan buyuk merosdir. Har ikki mutafakkir turli davrlarda yashab ijod qilgan bo`lsada, ularni she`riyatdagi insonparvarlikka intilish, islohotchilik ruhi birlashtiradi. Ular ikki qardosh xalqning ma`naviy ustunlaridir”, - dedi Qozog`iston Respublikasi madaniyat va sport vaziri Dauren Abaev.
"Abay. Qardosh xalqlar merosi" ko`rgazmasi qator bo`limlardan iborat bo`lib, quyidagilarni o`z ichiga olgan:
· Ko`chmanchi madaniyat Abay ijodi shakllanishidagi asosiy omil;
· Abay ijodida Alisher Navoiyning tutgan o`rni;
· Abay hayotining asosiy bosqichlari;
· Abay qahramonlari va syujetlari musavvirlar A. Kasteeva, U. Tansikbaeva, E. Sidorkina, N. Otepbaeva va boshqalar ijodida.
Ko`rgazma ochilishidan keyin Qozog`istonning O`zbekistondagi elchixonasi oldida Abay Qo`nonboev haykali poyiga gulchambar qo`yish marosimi o`tkazildi.
Ma`lumot uchun, bugun ish boshlagan «Abay. Qardosh xalqlar merosi» ko`rgazmasi 30 dekabrga qadar davom etadi.
Oybek Shukurov
