Ўзбекистон тасвирий санъат галереясида қозоқ адиби ва мутафаккири Абай Қўнонбоев ҳаёти ва ижодига бағишланган "Абай. Қардош халқлар мероси" кўргазмасининг очилиши бўлиб ўтди.
Тадбирни Бош вазир ўринбосари – Туризм ва маданий мерос вазири Азиз Абдуҳакимов очиб берди.
"Ушбу тадбир, Ўзбекистон ва Қозоғистон ўртасида дўстлик ришталарининг янада мустаҳкамланиб бораётганидан далолат беради. Бугун ўз эшикларини очаётган ушбу кўргазма буюк мутафаккир Алишер Навоий инсонпарварлик анъаналарини ўзида сақлаган Абай ижодини янада мукаммал англаш имконини беришига ишончимиз комил. Унинг барча халқлар тинчлик ва фаровонликда яшаши кераклиги, Шарқ ва Ғарб уйғунлиги, жаҳон меросини ўзлаштириш зарурати, энциклопедизмга интилиш, инсон табиатининг мукаммаллашувига оид ғоялари бугунга келиб ҳам ўз аҳамиятини йўқотмаган», - дея таъкидлади Азиз Абдуҳакимов.
Кўргазмада шунингдек қозоғистонликларнинг кундалик маиший ҳаётида фойдаланувчи, декоратив-амалий санъат буюмлари, Абай ҳаёти ва ижодига бағишланган тасвирий санъат асарлари, графиклари, шунингдек Абайнинг асарлари намойиш этилмоқда.
"Алишер Навоий ва Абай ижоди нафақат туркий, балки умуминсоний қадриятларнинг шаклланиши намунасини ўзида мужассам этган буюк меросдир. Ҳар икки мутафаккир турли даврларда яшаб ижод қилган бўлсада, уларни шеъриятдаги инсонпарварликка интилиш, ислоҳотчилик руҳи бирлаштиради. Улар икки қардош халқнинг маънавий устунларидир”, - деди Қозоғистон Республикаси маданият ва спорт вазири Даурен Абаев.
"Абай. Қардош халқлар мероси" кўргазмаси қатор бўлимлардан иборат бўлиб, қуйидагиларни ўз ичига олган:
· Кўчманчи маданият Абай ижоди шаклланишидаги асосий омил;
· Абай ижодида Алишер Навоийнинг тутган ўрни;
· Абай ҳаётининг асосий босқичлари;
· Абай қаҳрамонлари ва сюжетлари мусаввирлар А. Кастеева, У. Тансикбаева, Е. Сидоркина, Н. Отепбаева ва бошқалар ижодида.
Кўргазма очилишидан кейин Қозоғистоннинг Ўзбекистондаги элчихонаси олдида Абай Қўнонбоев ҳайкали пойига гулчамбар қўйиш маросими ўтказилди.
Маълумот учун, бугун иш бошлаган «Абай. Қардош халқлар мероси» кўргазмаси 30 декабрга қадар давом этади.
Ойбек Шукуров
