Turkmaniston Turkiyadan oq rangli turk Togg elektromobillarini yuborishni so`radi. Bu haqda Turkiya tashqi ishlar vaziri Mevlut Chavusho`g`li Konyaalti shahridagi Togg ko`rgazma maydoniga tashrifi chog`ida aytib o`tdi, deb xabar bergan Turkiya prezidenti matbuot xizmati.
Chavusho`g`lining so`zlariga ko`ra, u Turkmaniston tashqi ishlar vaziri Radish Meredov bilan telefonda gaplashgan va u oq rangli mashinalar jo`natishni so`ragan. Ma`lumot uchun: Turkmanistonda boshqa rangdagi avtomobillarni haydashga norasmiy taqiq bor.
“Agar Turkmaniston oq rangli mashinalarni xohlasa, biz bir oy ichida oq rangli mashinalar ishlab chiqaramiz va jo`natamiz. Hozir bizda qizil ranglar bor, ularni darhol yuborishimiz mumkin”, dedi Turkiya tashqi ishlar vaziri.
Eslatib o`tamiz, Togg T10X turk krossoverining seriyali ishlab chiqarilishi 2022 yil oktyabr oyida boshlangan. Sal avval Turkiya prezidenti Rajab Toyyib Erdo`g`on va uning rafiqasi birinchi ikkita qizil va ko`k rangli elektromobillarni oldi.
4 aprel kuni qizil rangli Togg T10X krossoveri Ozarbayjon prezidenti Ilhom Alievga topshirildi,10 aprel kuni O`zbekiston prezidentiga ham yuborilgani xabar qilindi. Shuningdek, Turkmanistonga ham yuborilayotgani aytilgan edi.
T10X elektromobilining narxi variantga qarab 953 mingdan 1,215 million liragacha (49 – 63 ming dollar) o`zgarib turadi.
