Avvalroq, ijtimoiy tarmoqlarda erkak kishi va IIO xodimlari ishtirokida janjal yuzaga kelgani aks etgan video tarqaldi.
Holat yuzasidan Toshkent shahar IIBB munosabat bildirdi.
Ma`lum bo`lishicha, joriy yilning 14 may kuni taxminan soat 18:00 larda Toshkent shahar IIBB YHXB xodimlari tomonidan Shayxontohur tumanidagi jarima maydonchalaridan biriga 1986 yilda tug`ilgan I.D. tomonidan hech qanday hujjatlarsiz boshqarib yurilgan TOYOTA rusumli transport vositasi ma`muriy bayonnoma asosida olib kelingan. Biroq hujjatlarni rasmiylashtirish jarayonida I.D. jamoat tartibini buzib, ichki ishlar organlari xodimlarining qonuniy talablarini bajarmay, ularga nisbatan qarshilik ko`rsatgan.
Mazkur holat yuzasidan Shayxontohur tumani IIO FMB tomonidan fuqaro I.D.ga nisbatan MJtKning 183-moddasi (mayda bezorilik), 194-moddasi (ichki ishlar organlari xodimining qonuniy talablarini bajarmaslik) va 195-moddasi (ichki ishlar organlari xodimlarining o`z xizmat burchlarini bajarishlariga qarshilik ko`rsatish) bilan ma`muriy bayonnoma rasmiylashtirilgan hamda jinoyat ishlari bo`yicha Shayxontohur tuman sudi tomonidan unga nisbatan 10 sutka ma`muriy qamoq jazosi tayinlangan.
