20 iyulga o`tar kechasi yuzlab iroqliklar Shvesiyaning Bag`doddagi elchixonasiga bostirib kirib, binoga o`t qo`yishdi.
Ma`lum qilinishicha, elchixona xodimlari jabrlanmagan. Shvesiya polisiyasi Stokgolmda Qur`on yoqish bilan miting o`tkazishga ruxsat berganidan keyin namoyishchilar diplomatik missiya binosiga bostirib kirishdi. Namoyishchilarning xatti-harakatlari ikki davlat tashqi ishlar vazirliklari tomonidan qoralangan.
Iroq polisiyasi namoyishchilarni tarqatib yuborish uchun suv purkagichlar va shovqinli miltiqlardan foydalangan, deya xabar beradi AFP.
Namoyishni Iroqning nufuzli ulamosi Muqtada as-Sadr tarafdorlari uyushtirgan. Bu Shvesiya polisiyasi Iroqning Stokgolmdagi elchixonasi yaqinida Qur`on yoqib yuborilgan aksiya o`tkazishga ruxsat berganidan keyin sodir bo`ldi.
