20 июлга ўтар кечаси юзлаб ироқликлар Швециянинг Бағдоддаги элчихонасига бостириб кириб, бинога ўт қўйишди.
Маълум қилинишича, элчихона ходимлари жабрланмаган. Швеция полицияси Стокголмда Қуръон ёқиш билан митинг ўтказишга рухсат берганидан кейин намойишчилар дипломатик миссия биносига бостириб киришди. Намойишчиларнинг хатти-ҳаракатлари икки давлат ташқи ишлар вазирликлари томонидан қораланган.
Ироқ полицияси намойишчиларни тарқатиб юбориш учун сув пуркагичлар ва шовқинли милтиқлардан фойдаланган, дея хабар беради АФП.
Намойишни Ироқнинг нуфузли уламоси Муқтада ас-Садр тарафдорлари уюштирган. Бу Швеция полицияси Ироқнинг Стокголмдаги элчихонаси яқинида Қуръон ёқиб юборилган акция ўтказишга рухсат берганидан кейин содир бўлди.
