⚡Xorijdan kelgan qizamiq bilan kasallanganlar bilan aloqada bo`lgan fuqarolarda qizamiq kasalligi aniqlanmoqda

Jahon Sog`liqni saqlash tashkiloti  ma`lumotlariga ko`ra emlashdan bosh tortganlar hisobiga, 2023 yilda dunyoda va Evropa mintaqasida qizamiq bo`yicha epidemiologik vaziyat keskinlashdi. 

Ayni paytda Ukrainada 23 070, Serbiyada 4 954, Fransiyada 2 576 , Gresiyada 2 476, Italiyada 2 020, Rossiyada 1 396, Gruziyada 1 128 holatda qizamiq kasalligi qayd etilgan. Bu haqda Sanepidqo`mita  Axborot xizmati xabar bermoqda.

Qo`shni mamlakatlar Afg`onistonda 2023 yilning hozirgacha bo`lgan davrida 2 105 holatda, Tojikistonda esa 300 dan ortiq Qozog`istonda 169 ta holat qayd etilgan.

Respublikamizda joriy yilning iyul oyi holatiga ko`ra, qizamiq kasalligiga shubha qilingan 306 nafar bemorning qon namunalari virusologik laboratoriyaga yuborilgan. 

Ulardan 164 tasida qizamiq aniqlangan. 

Shuni alohida ta`kidlab o`tish joizki, mamlakatimizda qizamiq bilan kasallanish holatlari asosan xorijdan kelgan qizamiq bilan kasallanganlar bilan aloqada bo`lgan fuqarolar orasida aniqlanmoqda. 

Hozirda mamlakatimizda qizamiq bo`yicha epidemiologik vaziyat nazorat ostida bo`lib, qizamiq kasalligiga shubha qilingan shaxslar bilan aloqada bo`lganlar epidemiologik ko`rsatma asosida profilaktik emlash bilan qamrab olinmoqda.