Buxoro viloyati Kogon tumanida 26 milliard so`mlik gazni o`g`irlagan “Hududgaz Buxoro”ning ikki mansabdori qamaldi. Bu haqda viloyat prokuraturasi axborot xizmati xabar berdi.
Unga ko`ra, Jinoyat ishlari bo`yicha Kogon tuman sudi tomonidan sudlanuvchilar A.Jabborov, J.Sultonov, M.Hayitov va A.Abdullaevlarga oid jinoyat ishi ko`rildi.
Sudlanuvchilar M.Hayitov va A.Abdullaevlar “Dildora” MChJ rahbari A.Jabborov hamda “Osiyo Buxoro gaz” MChJ rahbari J.Sultonov bilan til biriktirib, energoresurslarni o`g`irlash jinoyatlarini sodir etdi.
Xususan, M.Hayitov 2022 yil 15 avgustdan “Hududgazta`minot” AJning “Hududgaz Buxoro” gaz ta`minot filiali metrologiya xizmati boshlig`i vazifasida, A.Abdullaev metrologiya xizmati etakchi muhandisi vazifasida ishlab kelib, mansab vakolatlaridan qasddan foydalangan.
Jamiyat rahbarlari A.Jabbarov va J.Sultonovlar bilan oldindan jinoiy til biriktirib, jamiyatga qarashli gaz quyish shoxobchalariga kelgan alohida tabiiy gaz quvurining ulanish nuqtasiga o`rnatilgan “Avtopilot-PRO” rusumli gaz hisoblash uskunasi o`rnatilgan xonaning eshigining tamg`alanishini ta`minlamagan. Gaz hisoblagich uskunasidagi mavjud implyus trubkasi tamg`asini gaz mahsulotlari quvurlarida o`g`irlik qilish maqsadida hech qanday hujjasiz almashtirilgan.
Natijada “Hududgazta`minot” aksiyadorlik jamiyatining jami 26,1 milliard so`mlik juda ko`p miqdordagi tabiiy gazni o`g`irlab yashirin ravishda talon-toroj qilgan.
Jinoyat ishlari bo`yicha Kogon tuman sudining hukmiga ko`ra, Jinoyat kodeksining 169-moddasi 4 -qismining “a” bandi, 209-moddasi 2-qismining “a” bandi, 228-moddasi 2-qismining “a,b” bandlari bilan aybli deb topilgan A.Jabborov, J.Sultonovlar 11 yil, A.Abdullaev va M.Hayitovlar 9 yilga ozodlikdan mahrum etildi.
Shuningdek, ayblanuvchilar tomonidan 6 milliard so`m zarar qoplangani sababli, qolgan 20,1 milliard so`m zarar sudlanuvchilardan solidar tartibda undirilishi belgilandi.
