Falastinning HAMAS harakatining hujumlari Isroil va Saudiya Arabistoni munosabatlariga putur etkazish maqsadida uyushtirilgan.Bu fikrni AQSh prezidenti Jo Bayden bildirgan.
“Ular mening saudiyaliklar bilan muzokara stoliga o`tirishimni bilishardi. Saudiyaliklar Isroilni tan olishni xohlashdi”, dedi Bayden mablag` yig`ish marosimida.
Uning so`zlariga ko`ra, HAMASning Isroilga hujum qilishi sabablaridan biri shundaki, u Isroil va Saudiya Arabistoni o`rtasidagi munosabatlarni normallashtirish jarayonini buzishi kerak edi.
Avvalroq Saudiya Arabistoni valiahd shahzodasi Muhammad bin Salmon blokadadagi G`azo sektoriga Isroil hujumlarini to`xtatish zarurligini ma`lum qilgandi.
"Biz bugun G`azo sektorida zo`ravonlik kuchayib borayotganidan qayg`udamiz, buning uchun begunoh fuqarolar o`layapti", - dedi u.
Isroil va Saudiya Arabistoni o`rtasida diplomatik aloqalar yo`q. Biroq, AQSh ma`muriyati Bahrayn, Birlashgan Arab Amirliklari (BAA), Marokash, Sudan va Isroil o`rtasida erishilgan kelishuvga o`xshash Ar-Riyod va Tel-Aviv o`rtasida vositachilik qilmoqda.
Isroil-Falastin mojarosi
7 oktyabr kuni ertalab HAMASning harbiy qanoti Izzaddin al-Qassam brigadalari Isroilga qarshi Al-Aqso to`foni operasiyasi boshlanganini e`lon qildi. G`azo sektoridan Isroil tomon minglab raketalar otildi, qurolli guruhlar Isroil aholi punktlariga kirdi.
HAMASning aytishicha, operasiya bosib olingan Sharqiy Quddusdagi Al-Aqso masjidiga bostirib kirishi va isroillik muhojirlarning falastinliklarga nisbatan zo`ravonligi kuchayib borayotganiga javoban amalga oshirilgan.
Bunga javoban Isroil armiyasi G`azo sektorida XAMASga qarshi o`nlab qiruvchi samolyotlardan foydalangan holda “Temir qilichlar” operasiyasi boshlanganini e`lon qildi.
Isroil-Falastin mojarosi avj olgandan beri 4100 dan ortiq falastinlik va 1400 isroillik halok bo`ldi.
