Surxondaryoda Eldor Shomurodov futbol akademiyasi ochiladi

Surxondaryoda Eldor Shomurodov futbol akademiyasi ochiladi. Bu haqda Surxondaryo viloyat hokimligi xabar berdi.

Viloyatimizning chekka va olis qishloqlaridagi iqtidorli yoshlarni aniqlash, futbol orqali ularning individual qobiliyatlarini ro`yobga chiqarish maqsadida surxondaryolik taniqli sportchi Eldor Shomurodov futbol akademiyasini tashkil etish rejalashtirilgan.

Bugun viloyat hokimi Ulug`bek Qosimov Termiz tumanida joylashgan Futbol akademiyasi negizida Eldor Shomurodov futbol akademiyasini qurish bo`yicha ishlab chiqilgan loyiha bilan tanishdi, deyiladi xabarda.

Ma`lumotlarga qaraganda qurilish ishlari 2024 yil yanvar oyidan boshlanishi rejalashtirilgan bo`lib, 154 o`rinli akademiya loyihasida yopiq va ochiq stadionlar, yotoqxona, oshxona hamda boshqa yordamchi binolar bo`lishi ko`zda tutilgan. 

Ma`lumot uchun, ayni dam Italiyaning "Kalyari" klubida to`p surayotgan 28 yoshli Eldor Shomurodov Surxondaryo viloyatining Jarqo`rg`on tumanida tug`ilgan. U futbolga ilk katta qadamlarini Qashqadaryoning "Mash`al" klubida tashlagan.