...Jannatga kirishni xohlagan banda Alloh taolo halol qilgan narsani halol, deb bilishi, harom qilgan narsani harom, deb bilishi va unga amal qilishi kerak.
Bu ham xuddi namoz o`qish va ro`za tutish kabi muhim. Hadisda zikr etilgan «bunga hech narsani ziyoda qilmasam ham jannatga kiramanmi?» degan jumladan namoz o`qib, ro`za tutib, halolni halol bilib, haromni harom sanab yurgan odam iymon keltirmasa ham, boshqa ibodatlarni inkor qilsa yoki ado qilmasa ham jannatga kiraverar ekan, degan noto`g`ri fikr chiqmasligi kerak...
Ro`zaning fazilatlari haqida
Abu Hurayra roziyallohu anhudan rivoyat qilinadi: «Nabiy sollallohu alayhi vasallam: «Alloh taolo Odam bolasining hamma amali o`zi uchun, faqat ro`za Men uchundir va uning mukofotini Men - O`zim berurman, dedi. Ro`za saqlovchidir. Qachon qaysi biringiz ro`zador bo`lsa, fahshdan gapirmasin va baqir-chaqir qilmasin. Agar birortasi u bilan so`kishmoqchi yoki urishmoqchi bo`lsa, men ro`zadorman, desin. Muhammadning joni qo`lida bo`lgan zot ila qasamki, albatta, ro`zador og`zining hidi Allohning nazdida mushkning hididan xushbo`yroqdir. Ro`zadorga ikki xursandlik bordir. U ik-kisini ham yashagay. Qachon iftor qilsa xursand bo`lgay va qachon Robbisiga muloqot bo`lganda ro`zasi ila xursand bo`lgay», dedilar». Beshovlari rivoyat qilganlar.Boshqa bir rivoyatda: «Odam bolasining hamma amali (savobi) ko`paytirib berilur. Bir yaxshilikka uning o`n mislidan to etti yuz ba-robarigacha. Alloh azza va jalla, «Magar ro`za Men uchun-dir. Uning mukofotini Men berurman. U (Odam bolasi) shahvati va taomini Men uchun tark qilur», dedi» deyilgaan.
Sharh: Bu rivoyatda hadisi qudsiy bilan hadisi sharif aralash holda kelmoqda. Alloh taolo nomidan aytilgan so`zlar hadisi qudsiy va Payg`ambarimiz sollallohu alayhi vasallamning nomlaridan aytilgani hadisi sharifdir. Avvalo hadisi qudsiy kelmoqda: «Alloh taolo Odam bolasining hamma amali o`zi uchun, faqat Ro`za Men uchundir va uning mukofotini Men O`zim berurman», dedi». Demak, insonning Ro`zadan boshqa hamma qilgan amali o`zi uchun bo`ladi. Faqatgina tutgan Ro`zasi Alloh uchundir.
Ya`ni Ro`zadan boshqa hamma amallarda amal qilguvchi xohlasa ham, xohlamasa ham bir oz xo`jako`rsinlik, o`zgalarning havasi, maqtovi, obro`-e`tibor paydo bo`ladi. Misol uchun, namoz o`qigan odam, tahorat qilganda, namozga joy tanlaganda va nihoyat namoz o`qiyotganda boshqalar ko`radi. Bu odam namoz uchun tahorat qilmoqda, bu odam namoz uchun joy tanlamoqda, bu odam namoz o`qimoqda, yaxshi odam ekan, degan fikr xayollaridan o`tadi, unga hurmat e`tibor bilan qaraydi. Shuningdek, zakot berganda har qancha yashirsa ham hech bo`lmaganda zakotni olgan kishilar biladi, haqqiga duo qiladi. Hajga borganda esa, umuman, shov-shuv bo`lib ketadi. Qaytganidan so`ng guruh-guruh kishilar ziyoratiga keladi. «Hoji aka» yoki «Hoji ona» degan nom bilan chaqiriladigan bo`lib qoladi. Ro`zada esa, bu narsalarning birortasi yo`q, kechasi hech kim ko`rmaydigan vaqtda saharlik qiladi. Kunduzi esa hamma barobar yuraveradi. Iftor vaqti kirayotganda ham, hech kimsiz yolg`iz o`zi qolganida ham ro`zador Alloh taolo ko`rib turganini his qilib, og`zini ochib yubormaydi. Ana shularning hammasi Ro`za Alloh uchun tutilishining belgisidir. Shuning uchun ham yolg`iz Alloh uchun bo`lgan ibodatning mukofotini Alloh taolo O`zi bilib berishga va`da qilmoqda.
