Ijtimoiy tarmoqlarda Hindistonda tarovih namozi o`qiyotgan O`zbekiston, Bangladesh va Afg`oniston talabalari hujumga uchragani qaytilgan video tarqaldi.
Xabarlarda Hindistonning Gujarat universitetida ta`lim olayotgan xorijlik yoshlar mahalliy noma`lum guruh a`zolari tomonidan tazyiqqa uchragani va ular orasida o`zbekistonlik talaba ham borligi aytilgan.
Mamlakatimizning Dehlidagi elchixonasi konsullik bo`limi ushbu voqea yuzasidan tezkor surishtiruv ishlarini amalga oshirgan.
Diplomatiya missiyasining konsullik hisobida Gujarat universitetida o`qiyotgan O`zbekiston vakillari yo`qligi ma`lum bo`lgan. Shuningdek, Hindistondagi o`zbek talabalari hamjamiyati a`zolari yuqorida nomi keltirilgan oliy bilim yurtida mamlakatimiz vakillari borligini tasdiqlamadi.
Hindistonning rasmiy idoralari bilan olib borilgan muloqotlar doirasida ham Gujarat universitetida o`zbekistonlik yoshlar tahsil olmasligi aniqlandi.
"Mamlakatimizning Dehlidagi elchixonasi ushbu voqeani o`rganish munosabati bilan Hindistonda ta`lim olish yoki boshqa maqsadlar bilan uzoq muddat davomida bo`lib turgan vatandoshlarimizga ularning diplomatiya missiyasida konsullik hisobiga turishi zarurligini qat`iyat bilan yana bir bor eslatib o`tadi.
Bu esa turli kutilmagan noxush hollarga tushib qolgan fuqarolarimizga tezkor va samarali konsullik-huquqiy yordam ko`rsatish uchun imkoniyat yaratadi.
Elchixona konsullik bo`limiga quyidagi aloqa vositalari orqali murojaat qilish mumkin:
Telefon: +91 11 2467 0774/75
El. pochta: in.uzembassy@mfa.uz va info.uzbekembassy@gmail.com
Telegram-bot: @consuluzbindia_bot", deyiladi bayonotda.