Tibbiyot sohasining yosh mutaxassislari Toshkent shahrida bo`lib o`tgan uchinchi «Akusherlik va ginekologiyaning dolzarb masalalari» mavzusidagi Yoshlar ilmiy-amaliy konferensiyasida ishtirok etdi. Bu haqda Respublika ixtisoslashtirilgan ona va bola salomatligi ilmiy-amaliy tibbiyot markazi xabar qilmoqda.
Forumda mamlakatimiz tadqiqotchilari bilan birgalikda Rossiya, Qozog`iston, Turkmaniston, Ozarbayjonning tibbiyot fani vakillari ham ishtirok etdi.
Yoshlar konferensiyasi O`zbekiston Respublikasi Sog`liqni saqlash vazirligi hamda Respublika ixtisoslashtirilgan ona va bola salomatligi ilmiy-amaliy tibbiyot markazi (RIOvaBSIATM) tomonidan tashkil etildi.
«Bugungi dunyo yosh olimlardan nafaqat o`z sohasini bilishini, shu bilan birga noan`anaviy fikr yuritishni, o`zlarining qimmatli g`oyalarini yuzaga chiqara bilishlarini talab etadi. Shu tufayli yosh olimlar forumining muhimligi va ahamiyati, shubhasiz o`sib boryapti», — deb ta`kidladi kirish so`zida O`zbekiston Respublikasi Sog`liqni saqlash vaziri v.v.b. Asilbek Xudoyorov.
U bugungi yosh olimlar tadqiqotlarining asosiy vazifasi yangi g`oyalarning tug`ilishi, ularning muhokamasi va tarqatilishidan iborat ekanligini ta`kidladi.
«Tibbiyot ilmiy ishlanmalar va ularning kelgusida amaliy qo`llanilishi uchun ilg`or platformalardan biri sanaladi, va sizlarning oldingizda o`z iqtidorligingizni namoyish etishga zo`r imkoniyat paydo bo`lyapti», — dedi yosh ishtirokchilarga murojaat qila turib, vazirlik rahbari.
Ona va bola markazi rahbari Natalya Nadrxanova ta`kidlaganidek, bugun sog`liqni saqlash tizimidagi, ayniqsa, ona bola salomatligini muhofaza qilish sohasidagi mutaxassislar oldiga juda yuqori talablar qo`yilyapti. Shuning uchun ta`limning ham diplomgacha, ham diplomdan keyingi bosqichida yuqori malakali kadrlar tayyorlash muhim rol o`ynaydi. Va yosh mutaxassisilar orasida ilmiy-amaliy konferensiyaning o`tkazilishi yosh kadrlarning malaka va ilmiy salohiyatini oshirishning, mamlakatimiz sog`liqni saqlash tizimining raqobatbardoshligini oshirishning samarali formati sanaladi.
BMTning Aholishunoslik jamg`armasi (YuNFPA)ning O`zbekistondagi vakili Nigina Abasadze o`z so`zida mamlakatimizda tibbiyot sohasining yosh mutaxassislari va ilmiy tadqiqotlar har doim qo`llab-quvvatlanib kelinishini ta`kidladi. Shu yo`l bilan akusherlik va ginekologiya sohasi, reproduktiv xizmatlar sifatli bo`lishi, rivojlanishi, u erlarda o`z ishini puxta biladigan, taraqqiyot bilan hamqadam mutaxassislar ishlashlari uchun qulay sharoitlar yaratilyapti.
«Biz hammamiz shuni yaxshi bilamizki, innovasion fikr taraqqiyot tufayli harakatlanadi. Yana shuni bilamizki, izlanuvchan aqllar dunyoni oldinga intiltiradi, va shuning uchun yosh mutaxassislar — bizning tibbiyotimiz kelajagidir», — dedi YuNFPA vakolatxonasi rahbari.
Forumning yosh ishtirokchilariga qarata murojaat qila turib, u shunday dedi: «Men Sizlarga muvaffaqiyatlar tilashni, Sizlarning tadqiqotlaringizdan kelib chiqadigan innovasion fikrning amaliyot bilan uyg`unlashib ketishini va O`zbekiston, ehtimol, hudud xalqiga foyda keltirishini istayman».
Uchinchi konferensiya xalqaro miqyosi bilan voqeaga aylandi. Xorijiy ishtirokchilardan biri sifatida V.A. Almazov nomidagi Milliytibbiyot tadqiqot markazi (Rossiya Sankt-Peterburg shahri) yosh olimlari ham bunda ishtirok etdi. Ishtirokchilarni onlayn aloqa orqali ushbu Markaz akusherlik va ginekologiya kafedrasi mudiri Irnina Zazerskaya tabrikladi. U kishi qadimiy o`zbek zamini ta`lim va ilmiy fikrning asrlarga teng an`analariga ega ekanligini, va bu zaminda bo`la turib, ushbu zaminda an`anaviy rivojlanib borgan ilmlarni bera turib, yangilikka erishishga bo`lgan ehtiyojning noyob quvvatini hsi etish mumkinligini ta`kidladi. Yoshlar forumining o`zi esa, — dedi I. Zazerskaya,— bu haqiqiy muloqot, yangi do`stona munosabatlar, yangi bilim va axborotlar almashinuvi bayramidir.
Forum doirasida yoshlar tadqiqotlarining ham, hamfikrlar bilan tanishishning ham muhimligi haqida yosh tibbiyot xodimlarining o`zlari ham fikr bildirdi.
«Bugungi kunda isbotlangan tibbiyot juda zarur va har bir yosh shifokor buni yaxshi tushunadi, shuning uchun eng zamonaviy faktlarga asosan davolashga intiladi. Ushbu faktlarning bo`lishi uchun tadqiqotlar, jumladan, mazkur konferensiyada taqdim etilgan tadqiqotlar zarur», — deb hisoblaydi Ona va bola markazining ordinatori Karina Maxsudova.
Karina konferensiyani tayyorlashda bevosita ishtirok etdi. U ma`ruzalarni tanlashga jiddiy e`tibor qaratilganini aytdi.
«Tayyorgarlik ko`rish ustida ishlash juda qiziq va mas`uliyatli edi, chunki biz tezis va ma`ruzalarni saraladik, va men buning qanchalik ko`p mehnat talab qilishidan taajjublandim. Har bir xat, har bir arizani tekshirib ko`rish va ularga javob qaytarish ter to`kib ishlaydigan mehnat. Shunday bo`lsada, ular orasidan eng yaxshilarini tanlash kerak edi».
Toshkent konferensiyasiga akusherlik va ginekologiya sohasidagai zamonaviy yangi axborotlar bilan o`rtoqlashishga V.A Almazova nomidagi Rossiya Milliy tibbiy-tadqiqot markazi yosh mutaxassisi Natalya Panikarova keldi.
«Yoshlar konferensiyasi juda muhim format, o`ylaymanki, yoshlarda har doim ulkan salohiyat mavjud. Hozir bu yoshda kuch-quvvat, g`ayrat va yangi narsalarni o`rganish istagi ko`p bo`ladi» , — deb hisoblaydi rossiyalik yosh mutaxassis.
Natalya yana xalqaro aloqalarning, bunday tadbirlar imkon yaratib beradigan munosabatlar katta ahamiyat kasb etishini ham ta`kidladi.
«Xalqaro miqyosdagi yoshlar konferensiyasi — bu, bir jihatdan, xorijiy tengdoshlarining yangi g`oyalarini tinglash, yana bir jihatdan esa o`zingning tadqiqoting haqidagi ularning fikrlarini bilish, — deb hisoblaydi Qozog`iston akusherlik va ginekologiya, perinatologiya va ginekologiya milliy markazi rezidenti, Olma-otalik shifokor genetik Benazir Amirbaeva. — Shuningdek hamkasblarimizdan O`zbekistondagi o`qish va ishlash uchun sharoitlar haqida, ularning imkoniyatlari va rejalari haqida bilish juda qiziq».
Benazirning ishonchi komilki, sen hamma bilan barobar bo`lgan aynan yoshlar konferensiyasi formati hatto ortiqcha tortinchoqlikdan aziyat chekayotgan tadqiqot mualliflariga ham o`zlarini ko`rsatish imkonini beradi. Tengdoshlari orasida o`z g`oyalarini munosib taqdim etish, ularni muhokama qilish oson kechadi.
Toshkentdagi anjumanda neonatologiyadagi Qozog`iston tajribasini ushbu Olma-ota ilmiy markaz rezidenti, shifokor Nargiza Asqarovataqdim etdi. U o`zining yurtida deyarli har bir tibbiy markaz yoshlar ilmiy tadbirlarini o`tkazishga harakat qilishini ma`lum qildi. Shuning uchun bunday keng miqyosdagi konferensiyani tashkil etishda, O`zbekiston tajribasi, hamda o`z tengdoshlari oldida o`zining ilmiy g`oyalarini taqdim etish ular uchun juda qiziq ekanligini ta`kidladi.
Ilmiy nuqtai nazardan yoshlar konferensiyasining maqsadi — yoshlarni ilmiy faoliyat atrofida to`plash, deb hisoblaydi RIOvaBSIATM direktor o`rinbosari Feruza Nishanova.
«Aynan mana shunday konferensiyalar ilmiy ishlarni amalga oshirish doirasida nutq so`zlash ko`nikmalarini egallash imkonini yaratadi. Undan tashqari konferensiya salohiyati inobatga olinadigan eng yaxshi ishtirokchilarni aniqlashga yordam beradi. Xususan, stajer -tadqiqotchi sifatida keyinchalik doktoranturaga o`tish uchun diplomdan keyingi ta`limni davom ettirishda yangi bosqich deb hisoblash mumkin», deya ta`kidladi u intervyuda.
O`zbekiston hududlari yoshlarining bunday konferensiyalarni o`tkazishga qiziqishi juda baland, — deb ta`kidladi Andijon tibbiyot instituti akusherlik va ginekologiya kafedrasi mudiri Dilorom Asranqulova. Bu safar Toshkentga hududdan to`rt nafar delegat kelgan. Lekin yana ko`pchilik kelishga istak bildirdi. Andijon tibbiyot institutining o`zida ham 19 martda an`anaviy ilmiy konferensiya tashkil etildi. Va ularning ishtirokchilarining gibrid formatdagi ishtiroki, talabalarning, klinik ordinatorlarning, magistrantlarning imkon qadar ko`p narsa bilishga va tibbiyotdagi o`z g`oyalari bilan o`rtoqlashishga intilishini isbotladi.
«Konferensiyadagi ma`ruzalarni baholashda asosiy mezonlardan biri — bu yosh tadqiqotchining o`zi tomonidan o`tkazilgan tadqiqotning originalligi», — deya ta`kidladi jyuri raisi, RIOvaBSIATM kadrlar tayyorlash markazining etuk mutaxassisi Sevara Ergasheva.
«Ilmiy-amaliy tarkibdan iborat tadqiqotlar olqishlanadi. Ya`ni u original g`oya bo`lishi kerak. U yosh olim nuqtai nazaridan qandaydir amaliyotga ega bo`lishi — foyda keltirishi, ma`lum muammoni, vazifani hal etishi kerak. Shuning uchun yosh tadqiqotchi sifatida aynan uning talabnomasini baholaymiz. Chunki bu tadqiqotlar ertaga bizga ilmiy salohiyat — akusherlik va ginekologiyada qiziq g`oya va ishlanmalarni beradi», — deb hisoblaydi jyuri raisi.
Shuni ta`kidlaymizki, konferensiya xulosalariga ko`ra, 3 ta eng yaxshi ma`ruzalar va 3ta poster ma`ruzalar muallifi diplom va esdalik sovg`alari bilan mukofotlandi.