O`zbekiston Respublikasi Prezidenti Shavkat Mirziyoev 15 aprel kuni Markaziy Osiyo mamlakatlari va Ko`rfaz arab davlatlari tashqi ishlar vazirlari yig`ilishi doirasida mamlakatimizda bo`lib turgan Saudiya Arabistoni tashqi ishlar vaziri shahzoda Faysal bin Farxon Ol Saud hamda strategik muloqotida ishtirok etish uchun mamlamkatimizga kelgan O`mon Sultonligi tashqi ishlar vaziri Badr bin Hamad al-Busaydiy boshchiligidagi delegasiyani qabul qildi. Bu haqda Prezident Matbuot xizmati xabar berdi.
Saudiya Arabistoni tashqi siyosiy idorasi rahbari O`zbekiston etakchisiga Podshoh Salmon bin Abdulaziz Ol Saud va Valiahd, Bosh vazir Muhammad bin Salmon Ol Saudning samimiy salomi va ezgu tilaklarini etkazdi.
O`zbekiston bilan Saudiya Arabistoni o`rtasidagi ko`p qirrali munosabatlarni va keng ko`lamli sheriklikni oliy darajada erishilgan kelishuvlarni amalga oshirish nuqtai nazaridan yanada kengaytirish masalalari ko`rib chiqildi.
Bugungi kunda turli darajalarda faol muloqotlar va delegasiyalarning o`zaro tashriflari davom etmoqda. O`zaro savdo hajmi, qo`shma korxonalar va aviaqatnovlar soni oshib bormoqda.
“Yashil” energetika, qishloq xo`jaligi, sog`liqni saqlash, transport infratuzilmasini modernizasiya qilish, IT va boshqa ustuvor sohalarda kooperasiya loyihalari boshlangan.
O`zbekistonda faoliyat yuritayotgan qo`shma investisiya kompaniyasining loyihalar portfelini kengaytirish muhim ekani qayd etildi.
Bank sohasini rivojlantirish, raqamli texnologiyalar, energetika, sanoat, qishloq xo`jaligi, ta`lim kabi ustuvor yo`nalishlarda yangi loyiha va dasturlarni amalga oshirish taklif qilindi.
Bo`lajak tadbirlar, shu jumladan 2025 yilda o`tkaziladigan “Markaziy Osiyo – Ko`rfaz arab davlatlari hamkorlik kengashi” muloqotining ikkinchi sammitiga puxta tayyorgarlik ko`rish masalalariga alohida e`tibor qaratildi.
O`zaro muloqotlarni va hamkorlikning institusional mexanizmlarini faollashtirish – siyosiy maslahatlashuvlar, Hukumatlararo komissiya yig`ilishlari, biznes forumlari va ko`rgazmalarni muntazam o`tkazib borish zarurligi ta`kidlandi.
Bundan tashqari, mintaqaviy kun tartibidagi boshqa masalalar, xususan, Afg`onistondagi vaziyat va Falastin muammosini tinch yo`l bilan hal etish yuzasidan fikr almashildi.
