Ijtimoiy tarmoqlarda Jizzax viloyatining Yangiobod tumanida aholi yashash xonadonlariga tog`dan ayiq tushib kelgani haqidagi xabarlar tarqalgandi. Holat yuzasidan Jizzax viloyati Ekologiya boshqarmasi matbuot xizmati ma`lumot berdi.
Ushbu holat Jizzax viloyati Ekologiya, atrof-muhitni muhofaza qilish va iqlim o`zgarishi boshqarmasi hamda viloyat IIB xodimlari tomonidan o`rganilgan.
O`rganish davomida haqiqatan ham 17 aprel kuni tunda Yangiobod tumanining “Do`stlik” mahallasi “Chakan” qishlog`i hududiga tog`dan ayiq tushib kelgani va tong vaqtida Yangiobod tumani o`rmon xo`jaligi hududiga o`tib ketgani aniqlangan. U mahalla aholisi, xonadonlar va chorva mollariga zarar etkazmagan.
“Hozirda tuman Ekologiya inspeksiyasi va viloyat IIB xodimlari tomonidan ayiqni o`rmon xo`jaligi hududidan o`z yashash arealiga betalafot o`tkazib yuborish choralari ko`rilmoqda”,– deyiladi xabarda.